Blogs Blogs

የኢህአዴግ 11ኛ መደበኛ ድርጅታዊ ጉባኤ የአቋም መግለጫ

የኢህአዴግ 11ኛ መደበኛ ድርጅታዊ ጉባኤ የአቋም መግለጫ
~~~~~~
የኢትዮጵያ ህዝቦች አብዮታዊ ዴሞክራሲያዊ ግንባር /ኢህአዴግ/ “ሀገራዊ አንድነት ለሁለንተናዊ ብልጽግና” በሚል መሪ ቃል 11ኛ መደበኛ ድርጅታዊ ጉባኤውን በብሄር ብሄረሰቦች መዲና፣ የህብረ ብሄራዊነትና የብዝሃነት መገለጫ እና የኢትዮጵያ ተምሳሌት በሆነችው ውቢቷ ሀዋሣ ከተማ ከመስከረም 23 – 25/2011 ዓ/ም ለሶስት ተከታታይ ቀናት አካሂዶ በስኬትና በድል አጠናቅቋል፡፡


የድርጅታችን አባላትና የትግላችን ደጋፊዎች፣ አጋሮቻችን፣ ወዳጆቻችንና መላው የአገራችን ህዝቦች የጀመርነውን ለውጥ አጠናክረን እንድንቀጥል፣ ድርጅታችን ከምንግዜውም በላይ እንዲጠናከር እና የመሪነት ሚናውን በአግባቡ እንዲወጣ፣ የፈነጠቀው ተስፋ የበለጠ እየለመለመ እንዲሄድ የሚያስችሉ ውሳኔዎችን አስተላልፎና አቅጣጫዎችን አስቀምጦ እንዲጠናቀቅ በጉጉት ሲጠብቁት የነበረው ታሪካዊ ጉባኤ በስኬት በማጠናቀቅ መድረኩን የሚመጥን ቁመና ተላብሰን፣ እንደ ኢህአዴግ አንድነታችንን አጠናክረን መውጣታችንን ስንገልጽ በከፍተኛ መነሳሳትና ቁርጠኝነት ነው፡፡


11ኛው መደበኛ ድርጅታዊ ጉባኤያችን ታሪካዊ ነው የሚያሰኙት በርካታ እውነታዎች ቢኖሩም ሁነኛ መገለጫው አገር የመበታተን፣ የአንድ አገር ህዝብ እርስ በርስ የመተላለቅና የድርጅታችን ህልውና የማክተም አደጋ አንዣቦበት ከነበረበት ሁኔታ በማምለጥ የሰላም፣ የይቅርታ፣ የፍቅርና አንድነት ተስፋ በለመለመበት ወሳኝ ወቅት ላይ መሆኑ፤ እንዲሁም ኢህአዴግ ለውጡን በፍጥነት እና በዘለቄታ ይዞ መጓዝ የሚያስችለው ቁመና የሚያላብሱ ውሳኔዎች የተላለፉበት መሆኑ ነው፡፡ 
በ10ኛው ድርጅታዊ ጉባኤ የተቀመጡ አቅጣጫዎች አፈፃፀም ሪፖርት በመገምገም፣ ወቅታዊ ሀገራዊ ሁኔታና ለውጡን በብቃት የመምራት አስፈላጊነት ላይ በጥልቀት በመወያየት መግባባት ላይ የተደረሰ ሲሆን እንደዚሁም የድርጅታችን የኦዲትና ቁጥጥር ኮሚሽን ሪፖርት ገምግሞ የቀጣይ ርብርብ አቅጣጫዎችን አስቀምጦ ድርጅቱን እስከቀጣይ ጉባኤ የሚመሩ መሪዎችን ዴሞክራሲያዊ በሆነ መልኩ መርጦ ተጠናቅቋል፡፡


ጉባኤያችን እንደ ድርጅት ህዝቡ የሚጠብቀውን ለውጡን በብቃት፣ በፍጥነት እና በቁርጠኝነት በመምራት ህዝባችንን ከስጋት ማላቀቅ የሚያስችል የሀሳብ አንድነት የፈጠርንበት፣ በችግሮቻችንና በመፍትሄ አቅጣጫዎቹ ላይ ልብ ለልብ ተገናኝተን አንድነት ፈጥረን የወጣንበት ጉባኤ ነው፡፡


ኢህአዴግ ባለፉት ሶስት አስርት በሚጠጉ ዓመታት ያስመዘገብናቸው ስኬቶች እንደተጠበቁ ሆነው የህዝቡን የለውጥ ጥማት ሊያረካ የሚችል ሥራ በሚፈለገው ደረጃ ባለመሰራቱ፣ የዴሞክራሲ ባህል አለመጐልበቱ፣ ምህዳሩ እየጠበበ መምጣቱ፣ የሥራ ዕድል ፈጠራ በሚፈለገው ልክ አለመሠራቱ፣ የሰብዓዊ መብት ጥሰቶች በስፋት በመታየታቸው፣ የህዝቡ ፍትሐዊ ተሳትፎና ተጠቃሚነት ላይ የሚነሱ ጥያቄዎች ጐልተው በመውጣታቸው፣ የመሠረተ ልማት ተደራሽነትና ጥራት ችግሮች በመታየታቸው፣ ብልሹ አስተዳደር እየሰፋ በመሄዱ፣ የተደራጀ ሌብነት እየረቀቀና ስር እየሰደደ በመምጣቱ ምክንያት ማህበራዊ መሠረቶቻችንን ጨምሮ በህዝቡ ዘንድ ድርጅታችን ያለው ተዓማኒነት የመሸርሸር አደጋ እንዲጋረጥበት ሆኖ ነበር፡፡ የማታ የማታ ችግሮች እየተደማመሩ መጥተው ወደ ግጭትና አለመረጋጋት ብሎም የአገራችንን ህልውና አደጋ ላይ ወደሚጥል ፖለቲካዊ ቀውስ መግባታችን ይታወቃል፡፡
በዚህም ምክንያት በተፈጠሩ ግጭቶች የሰው ህይወት ጠፍቷል፣ የዜጐች አካል ተጐድቷል፣ የመንግስትና ህዝብ ንብረት ወድሟል፡፡ የችግሮቹ ምንጮቹም በዋናነት ከእኛ የመሪነት ጉድለት ጋር እንደሚያያዙ ጉባኤው በአጽንዖት ገምግሟል፡፡


ድርጅታችን የተስተዋሉበትን ድክመቶች ለማረምና ሀገራችንን ከጥፋት ለማዳን በሕዝቡ ግፊት ከውስጥ የመነጨ የጥልቅ ተሀድሶ ንቅናቄ ጀምሮ አሁን የምንገኝበት ተሰፋ ሰጪ የለውጥ ምህዋር ውስጥ ገብተናል፡፡
እኛ የ11ኛ የኢህአዴግ ድርጅታዊ ጉባኤ ተሳታፊዎች እንደ ድርጅት የመጣንበት መንገድ፣ አሁን የምንገኝበትን ወቅታዊ ሁኔታ በጥልቀት በመገምገም በሀገራችን ህዝቦች፣ በአጐራባች ሀገሮች እና በመላው ዓለም ዕውቅና የተቸረው የሀገራችን ጅምር የለውጥ እንቅስቃሴ ጐልብቶ ወደማይቀለበስበት ደረጃ ለማድረስ የሚያስችል ይህንን ባለ 7 ነጥብ የአቋም መግለጫ አውጥተናል፡፡
1. በሀገራችን ህዝቦች አነሳሽነት እና በኢህአዴግ መሪነት ሀገራችን ወደ ተስፋ ሰጪ የለውጥ ምዕራፍ ገብታለች፡፡ ይህ የለውጥ ምዕራፍ የፈነጠቀው የተስፋ ብርሃን በኢትዮጵያውያን ልብ ውስጥ መነቃቃትን ከመፍጠሩም ባሻገር ለዘመናት ተኮራርፈው የዘለቁ ወገኖች እንዲታረቁ፣ የታሰሩ እንዲፈቱና የተለያዩ እንዲገናኙ በማድረግ ብሄራዊ መግባባት ከፍ እንዲል ትልቅ አስተዋፅዖ እንዳበረከተ በጉባኤያችን ታይቷል፡፡

በመሆኑም በሀገራችን እየተመዘገበ ያለው ለውጥ ህዝባዊ፣ ህገ መንግስታዊ እና ኢህአዴጋዊ መሆኑ ላይ በመተማመን ለውጡ እንዳይቀለበስ የጉባኤው ተሳታፊዎች የየራሳችንን ታሪካዊ ኃላፊነት መወጣት እንዳለብን የጋራ አቋም ወስደናል፡፡ ኢህአዴግ እንደ ግንባር ጠንካራ የአስተሳሰብ አንድነት በመያዝ፣ ከአሰራር፣ ከአደረጃጀት እና ከአመራር ግንባታ አንፃር ያሉበትን ጉድለቶች ፈትሾ በማስተካከል እንዲሁም ጥናት ላይ በመመስረት የርዕዮተ -ዓለም ማልማትና ማሻሻልን ከግምት በማስገባት ድርጅቱ ለውጡን በብቃትና በሚፈለገው ፍጥነት መርተን ወደ ግቡ ለማድረስ በጋራ እንሠራለን፡፡

2. በሀገራችን የፖለቲካ ምህዳሩ ከጊዜ ወደ ጊዜ እየጠበበ በመምጣቱ ምክንያት የሀሳብ ብዙሃነትን በብቃት ያለማስተናገድ፣ የሀሳብና የፖለቲካ አቋም ልዩነቶች በጠላትነት የሚፈረጁበት፣ የሰብዓዊና ዴሞክራሲያዊ መብት ጥሰቶች እየሰፉ የመጡበት አገራዊ ሁኔታ ውስጥ የነበርን መሆናችንን የገመገምን ሲሆን ዴሞክራሲን በማስፋት ሀገራዊ መግባባትን ለመፍጠርና ችግሮቻችንን በሰለጠነ መንገድ ተወያይተን ለመፍታት የሚያስችሉ ጅምር እርምጃዎች ተወስደዋል፤ እየተወሰዱም ይገኛሉ፡፡ በተለያዩ ምክንያቶች ተፈርዶባቸው ማረሚያ ቤት የነበሩ የተፎካካሪ ፓርቲ መሪዎች፣ ጋዜጠኞችን ጨምሮ የተለያዩ የህብረተሰብ ክፍሎች በይቅርታና በምህረት እንዲፈቱ መደረጉ፣ የዴሞክራሲ ምህዳሩ ላይ ጥያቄ የሚያስነሱ እና መሻሻል የሚገባቸው ህጐች እንዲሻሻሉ አቅጣጫ መቀመጡ፣ የትጥቅ ትግልን እንደ አመራጭ ወስደው ሲንቀሳቀሱ የነበሩ በርካታ የፖለቲካ ፓርቲዎችና ቡድኖች ወደ ሠላማዊ ትግል መድረክ መመለስ መጀመራቸው ይበል የሚያሰኝ ተግባር መሆኑን ገምግመናል፡፡

በመሆኑም የዴሞክራሲ ምህዳሩን የበለጠ ማስፋት፣ ዜጐች በያዙት የተለየ የፖለቲካ ሀሳብ እና አመለካከት የማይገፉበትና በጠላትነት የማይታዩበት ሀገራዊ ሁኔታ እንዲፈጠር፣ የግልና የቡድን መብቶች በተሟላ መልኩ የሚከበሩበትን ሁኔታ በማመቻቸት፣ በሀገራችን የመድበለ ፓርቲ ሥርዓት እየተጠናከረ እንዲሄድ በጽናት እንታገላለን፡፡

3. ህብረ - ብሄራዊ ፌደራላዊ ሥርዓቱ ባልተማከለ አስተዳደር ብሔር - ብሔረሰቦችና ህዝቦች ራሳቸውን በራሳቸው እንዲያስተዳድሩ ዕድል የሰጠ፣ ህዝቦች በሀገሪቷ ፖለቲካዊ፣ ማህበራዊና ኢኮኖሚያዊ እንቅስቃሴ ውስጥ ቀጥተኛ ተሳትፎ እንዲኖራቸው ያስቻለ፣ የሀገራችንን አንድነት በጽኑ መሠረት ለመገንባት ብቸኛው አማራጭ እንደሆና በእኩልነት ላይ የተመሠረተ ሀገራዊ አንድነትን ለመፍጠር ወሳኝ ሚና በመጫወት ላይ እንደሚገኝ ተገምግሟል፡፡

ይሁን እንጂ የፌደራል ሥርዓት ግንባታችን በጅምር ደረጃ ላይ ያለ እንደመሆኑ መጠን የወሰን አከላለል ጥያቄዎች፣ ማንነትን መነሻ ያደረጉ ግጭቶች፣ የዜጐች ሞትና መፈናቀል፣ እንዲሁም ከቦታ ቦታ ተዘዋውሮ በነፃነት የመስራት ህገ - መንግስታዊ መብት ጥሰቶች ይስተዋላሉ፡፡

በመሆኑም እነዚህን ችግሮች ከሥረ - መሠረታቸው መነቅል የሚገባቸው ችግሮች በመሆናቸው የማንነትም ይሁን የአስተዳደር ወሰን ጥያቄዎች የሚመለከታቸውን ህዝቦች ነፃ ፍላጐት ከግምት ውስጥ ባስገባ፣ በህገ-መንግስታዊ እና ዴሞክራሲያዊ አግባብ እንዲፈቱ፣ የዜጐች የትም ቦታ ተዘዋውሮ የመኖር፣ የመስራት፣ በቋንቋቸው የመማር፣ የመዳኘት፣ ወግና ባህላቸውን የማሳደግ፣ ተገቢውን ዕውቅናና ውክልና የማግኘት፣ ሀብት የማፍራት፣ ህገ - መንግስታዊ መብቶቻቸው እንዲከበር እንዲሁም ብሄራዊ ማንነት እና ሃገራዊ አንድነት ሳይነጣጠሉ እንዲጐለብቱ አበክረን እንሰራለን፡፡

 

4. የምንገኝበት ወቅት የ2ኛው የዕድገት እና ትራንስፎርሜሽን ዕቅዳችንን ማጠናቀቂያ ዋዜማ እንደመሆኑ በኢኮኖሚው ዘርፍ መዋቅራዊ ሽግግር ለማረጋገጥ ምቹ ሁኔታ ለመፍጠር የሚያስችሉ ምርት እና ምርታማነትን ማሳደግ፣ ለገበያ የሚያመርቱ አርብቶ እና አርሶ አደሮችና በመደገፍ፣ የመስኖ እና መሰል የግብርና ልማት ስራዎችን በማፋጠን፣ የማኑፋክቸሪንግ ኢንዱስትሪ ልማትን በመደገፍ፣ በንግድ እና ኮንስትራክሽን ዘርፍ ያሉ ማነቆዎችን በመፍታት፣ ገቢ የመሰብሰብ አቅማችንን በማጠናከር የተረጋጋ ማክሮ ኢኮኖሚ መፍጠር አንገብጋቢ ጉዳይ መሆኑ በጉባኤያችን ላይ በዝርዝር ታይቷል፡፡

በመሆኑም በገጠርም ሆነ በከተማ ምርትና ምርታማነትን የሚያሳድጉ፣ የኢንቨስትመንት ፍሰቱን የሚያጠናክሩ፣ የኑሮ ውድነት እና የዋጋ ግሽበትን መቆጣጠር የሚያስችሉ፣ የመላውን ህዝብ ተሳትፎና ተጠቃሚነት ዕውን የሚያደርጉ፣ በተለይም የወጣቶችንና የሴቶች ተሳትፎና ተጠቃሚነት ለማረጋገጥ ከመቼውም ጊዜ በላቀ ሁኔታ ለመንቀሳቀስ ቃል እንገባለን፡፡

5. የቀሰቀስነው ለውጥ ተስፋ ሰጪ ውጤት እያስመዘገበ ያለው በሀገር ውስጥ ጉዳይ ብቻ ሳይሆን በውጭ ዲፕሎማሲ ዘርፍም ጭምር መሆኑን በዝርዝር የገመገምን ሲሆን ከጐረቤት ሀገሮች፤ በተለይም ከቀይ ባህር አካባቢ አገራት ጋር የፈጠርነው ትስስር ከፍተኛ ውጤት የተመዘገበበትና በምስራቅ አፍሪካ የኢኮኖሚ ትስስር ሁነኛ ሚና የሚጫወት የሰላም፣ የትብብርና የአንድነት ተስፋ የፈጠረ ግንኙነት መሆኑ በዝርዝር የገመገምን ሲሆን የኢትዮ - ኤርትራ ግንኙነት መታደስ በቅድሚያ ሊጠቀስ የሚገባው መሆኑን፤ እንዲሁም በሁለቱ ሀገራት ወንድማማች ህዝቦች መካከል ተዘርግቶ የነበረው ጥቁር መጋረጃ መቀደዱን ስኬታማ የዲፕለማሲ ስራ ውጤት መሆኑን እና ተጠናክሮ መቀጠል እንዳለበትም ገምግመናል፡፡

በመሆኑም ከሁሉም አጐራባች ሀገራት የሚኖረን ግንኙነት የጋራ ጥቅሞቻችን እና የህዝቦቻችን አንድነት የሚያጠናክሩ እንዲሆኑ በተለይም በኢትዮጵያና በሱዳን መካከል የሁለቱን ሀገራት ድንበር በተመለከተ መርህን በተከተለ፣ የህዝባችንን አንድነት በማያናጋ እና መልካም ጉርብትናን አጠናክሮ ማስቀጠል በሚያስችል መልኩ እልባት እንዲያገኝ እንሰራለን፡፡

6. በሀገራችን አንዳንድ አካባቢዎች አውዳሚ ግጭቶች፣ ሥርዓት አልበኝነት እና የህግ የበላይነትን የሚጥሱ ተግባራት ሲፈፀሙ ይስተዋላል፡፡ በስርዓተ አልበኝነት እና በመንጋ ፍትህ ምክንያት የዜጐች ሰብዓዊና ዴሞክራሲያዊ መብቶች የሚጣሱበት ነባራዊ ሁኔታ መኖሩን ጉባኤተኛው ገምግሟል፡፡

በመሆኑም ከዚህ ታሪካዊ ጉባኤ በኋላ ሃገራችን ሠላም የሠፈነባት፣ ዜጐች በነፃነት ተንቀሳቅሰው ያለ ስጋት የሚኖሩባት፣ የህግ የበላይነት የተከበረባት እንድትሆን፤ እንዲሁም ነፃነት ከህግ የበላይነት ውጪ ባርነት መሆኑን በመገንዘብ መብት ብቻ ሳይሆን ግዴታውንም ጠንቅቆ የሚያውቅ ህብረተሰብ ለመገንባት በትጋት እንሠራለን፡፡

7. በአገር ደረጃ የተለኮሰው የተሃድሦ እንቅስቃሴ የበለጠ እየጠራ እንዲሄድ፣ መሪው ድርጅታችን ኢህአዴግ ብቃት ያለው አመራር መሥጠት አለበት፡፡ ስለሆነም ድርጅታችን መሠረታዊ ባህሪውን ጠብቆ በውስጡ ያለውን ችግር በሚገባ አጥርቶ እንዲወጣ የተለየ ትኩረት ሰጥቶት መሠራት እንደሚገባውም ተገምግሟል፡፡ ከዚህ አኳያ የኢህአዴግ አባል ብሔራዊ ድርጅቶች ባካሄዱት ጉባኤ አዳዲስ ምሁራን፣ ወጣቶችና ሴቶችን ወደ አመራር ቋት ማስገባት መቻላቸውም በጥንካሬ ተገምግሟል፡፡ ይህ የተጀመረው ድርጅታችንን የማጠናከር ሥራ የበለጠ ተጠናክሮ እንዲቀጥል በማድረግ የተጀመረውን የለውጥ እንቅስቃሴ በብቃት ለመምራትና ህዝቡን ለመካስ ቃል እንገባለን፡፡

የተከበራችሁ የድርጅታችን አባላት፡-
ድርጅታችሁ ኢህአዴግ በዚህ ታሪካዊ ጉባኤ ያለፉትን ድክመቶችን በዝርዝር ገምግሞና ፈትሾ የእርምት ዕርምጃ ለመውሰድና ጥንካሬዎቻችንን እንዲጐለብቱ ለማድረግ ያስችል ዘንድ የጀመርነው ለውጥ ተጠናክሮ እንዲቀጥል እና እንዳይቀለበስ የሚያስችሉ አቅጣጫዎችን አስቀምጧል፡፡ ስለሆነም በመላው ሀገራችን ተስፋ የተጣለበት ለውጥ እንዲቀጥልና የበለጠ እንዲጠናከር ግንባር ቀደም ሚና የመጫወት ታሪካዊ ኃላፊነት በትከሻችሁ ላይ የወደቀ መሆኑን በመገንዘብ ግንባር ቀደም ሚናችሁን እንድትጫወቱ ጥሪ እናቀርብላችኋለን፡፡


የተከበራችሁ የሀገራችን ወጣቶችና ሴቶች፡-
ድርጅታችን ኢህአዴግ የሀገራችን ወጣቶችና ሴቶች ለሰላም ለልማትና ለዴሞክራሲ መረጋገጥ ያላችሁ ሚና ተኪ የሌለው መሆኑን ከማመኑም በላይ ለውጡ የእናንተ መሆኑን ይገነዘባል፡፡ ኢህአዴግ የዛሬ ብቻ ሳይሆን የነገ ድርጅት በመሆኑ የጓጓችሁለትና መስዋዕትነት የከፈላችሁለት ለውጥ በአስተማማኝ ሁኔታ እውን እንዲሆን በማድረግ ለውጥ ለማምጣት ካደረጋችሁት ትግል እና ከከፈላችሁት መስዋዕትነት ባሻገር ለውጡን የመንከባከብና የመጠበቅ ኃላፊነት እንዳለባችሁ በመገንዘብ የሕግ የበላይነት እንዲረጋገጥ አስተዋይነትና ብልህነት በተላበሰ ሁኔታ እንድትንቀሳቀሱ ጥሪ እናስተላልፈላችኋለን፡፡


የተከበራችሁ የሀገራችን ምሁራን
አሁን ሀገራችን የደረሰችበት የለውጥ ደረጃ የእናንተን ዕውቀት፣ ልምድና ችሎታ በከፍተኛ ሁኔታ ይፈልጋል፡፡ በመሆኑም የጀመርነው ለውጥ እንዲቀጥልና እንዲሳካ ጥናትና ምርምር በማድረግ እና ሳይንሳዊ ትንታኔ በመስጠት ያላችሁን ልምድ፣ ብቃት እና ተነሳሽነት ለወገናችሁ እንድታበረክቱ ጥሪ እናስተላልፍላችኋለን፡፡


የተከበራችሁ የአጋር ድርጅቶች
በጉባኤያችን መክፈቻ ስነ - ስርዓት ላይ እንዳስተላለፋችሁት መልዕክት ሁሉ ኢህአዴግም ከእናንተ ጋር በመዋሀድ አንድ ሀገራዊ ፓርቲ በመሆን ሁሉም ኢትዮጵያውያን የሚሳተፉበት እና የሚታገሉበት የጋራ መድረክ ይሆን ዘንድ የጥናት ሥራዎችን ተጀምረዋል፡፡ በመሆኑም እንደ አንድ ህብረ ብሄራዊና ሀገራዊ ድርጅት ለመንቀሳቀስ በሚያስችለን ህሊናዊና ነባራዊ ሁኔታ ላይ መሆናችንን እየገለጽን ለዚህ ዓላማ ስኬት ሁላችንም የበኩላችንን ድርሻ እንድንወጣ በዚህ አጋጣሚ ጥሪያችንን እናስተላልፋለን፡፡


የተከበራችሁ የተፎካካሪ ፓርቲዎች
ምንም እንኳን የተለያየ የፖለቲካ አቋም ቢኖረንም የሀገራችን ህዝቦች የመልማት፣ ሰብዓዊና ዴሞክራሲያዊ መብቶቻቸውን ማረጋገጥ የጋራ አጀንዳዎቻችን መሆናቸውን በውል እንገነዘባለን፡፡ እስከ አሁን ባለው ጊዜ በጥላቻ እና በመጠፋፋት ፖለቲካ በመጠመዳችን እና በጠላትነት በመተያየታችን ብዙ ዕድሎች አምልጠውናል፡፡ ስለሆነም ወቅቱ የሚጠይቀውን የአንድነትና የአብሮነት መንፈስ በመተጋገዝ እና በመርህ ላይ የተመሠረተ ትግል በማድረግ ሀገራዊ ለውጡን ወደ ላቀ ደረጃ ለማሸጋገር በሚደርገው ጥረት የበኩላችሁን ገንቢ ሚና እንድትጫወቱ ጥሪያችንን በአክብሮት ስናቀርብላችሁ የፖለቲካ ምህዳሩን የሚያሰፉ ተቋማትን፣ አሠራሮችን እና አደረጃጀቶችን በማሻሻል ምቹ ሁኔታ ለመፍጠር በቁርጠኝነት ለመስራት የተዘጋጀን መሆናችንን እንገልፃለን፡፡


የተከበራችሁ የመንግስት ሠራተኞች
የመንግስት ሠራተኛው አገልግሎታችንን የሚፈልገውን ህብረተሰብ በተገቢው ሁኔታ በማገልገል እርካታ ሊፈጥር የሚችል ታላቅ ኃይል መሆኑን እናምናለን፡፡ በመሆኑም የህብረተሰቡ የመልካም አስተዳደር ችግሮች እንዲፈቱ እና ዕርካታ እንዲረጋገጥ በቅንነት፣ በታማኝነት እና በውጤታማነት በማገልገል ለውጡን ለማስቀጠል የበኩላችሁን ሚና እንድትወጡ በዚህ አጋጣሚ ጥሪ እናስተላልፍላችኋለን፡፡


የተከበራችሁ የሀገራችን የፀጥታ አካላት፡-
የሀገራችንን ህዝቦች ሰላምና ፀጥታ እንዲሁም ደህንነት ለማስከበር እስከአሁን ለሰራችሁት ስራ እና ለከፈላችሁት መስዋዕትነት ታላቅ አክብሮት ያለን መሆኑን እየገለጽን ሀገራዊ ለውጡ በስኬት ግቡን እንዲመታ የህዝቦችን ሰላምና የሕግ የበላይነትን የማስከበር ህገ-መንግስታዊ ግዴታችሁን በጽናት እንድትወጡ በአክብሮት ጥሪያችንን እናስተላልፋለን፡፡


የተከበራችሁ የሀገራችን ህዝቦች፡-
ኢህአዴግ በ11ኛ መደበኛ ድርጅታዊ ጉባኤው ባለፉት ዓመታት ያስመዘገብናቸው ስኬቶች እንደተጠበቁ ሆነው ባላሟላናቸው ድክመቶች ምክንያት ቅሬታ የፈጠረባችሁና በዚህም ምክንያት በድርጅታችን ላይ ያላችሁ እምነት እየተሸረሸረ መምጣቱን ገምግሞ በእናንተ ቀስቃሽነትና በድርጅቱ መሪነት ተስፋ ሰጪ ለውጥ ላይ የምንገኝ መሆኑን በመገምገም ለውጡን ወደማይቀበለስበት ደረጃ የሚያደርሱ ታሪካዊ ውሳኔዎችን አስተላልፏል፡፡ ለሀገራዊ አንድነት፣ ለጋራ ብልጽግና፣ ለዘላቂ ሠላም መረጋገጥና የመደመር መርህዎችንና እሴቶችን ይዘን በጉባኤያችን ያስተላለፍናቸው ውሳኔዎች ዕውን እንዲሆኑ ሁለንተናዊ ተሳትፎአችሁና ድጋፋችሁ እንዳይለየን በታላቅ አክብሮት ጥሪአችንን እናስተላልፍላችኋለን፡፡

~~ "ሀገራዊ አንድነት ለሁለንተናዊ ብልጽግና !!!”~~
~~~~ ዘላለማዊ ክብር ለትግሉ ሰማዕታት!!~~~

~~~~~~~~~~መስከረም25/2011~~~~~~~

~~~~~~~~~~~~~ሐዋሣ~~~~~~~~~~~~

 

የብአዴን ም/ሊቀመንበር ጓድ ገዱ አንዳርጋቸው በጉባኤው ያቀረቡት ሙሉ መልእክት!!

የብአዴን ም/ሊቀመንበር ጓድ ገዱ አንዳርጋቸው በጉባኤው ያቀረቡት ሙሉ መልእክት!!
ጓድ ደመቀ መኮነን………. የብአዴን ሊቀ መንበር
የተከበራችሁ የጉባኤ አባላት
እህት እና አጋር ድርጅቶች
የተፎካካሪ ፓረቲ አባላት
ጥሪ የተደረገላችሁ እንግዶች

ከሁሉ አስቀድሜ እንኳን ለበአዴን 12ኛው ድርጅታዊ ጉበዔና ለክርስትና እምነት ተከታዮች ደግሞ አንኳን ለመስቀል (ደመራ) በአል በሰላም አደረሳችሁ እላለሁ፡፡
ሃገራችን ኢትዮጵያ በለውጥ እንቅስቃሴ ውሰጥ ትገኛለች፡፡ የተጀመረው የለውጥ ጉዞ ሰፊ፣ ፈጣንና ሑሉን አቀፍ ሲሆን በመላ ሃገራችን ህዝብ ዘንድ ተመናምኖ የነበረውን ተስፋ መልሶ ያለመለመ፣ ከገደል አፋፍ ደርሶ የነበረውን የኢትዮጵያን አንድ ሆኖ የመቀጠል ጉዞ እንደገና ወደነበረበት አቅጣጫ የመለሰና የዓለም ህዝብ ሃገራችንን ይመለከትበት የነበረውን መነጽር ያስቀየረ የብሩህ ዘመን መባቻ ነው፡፡
የአማራ ህዝብ ይህ የምንመለከተው አንጸባራቂ ሃገራዊ ለውጥ እንዲመጣ ትናንትም ዛሬም ውድ ልጆቹን እየገበረ ታግሏል አታግሏል፡፡ ይህ ህዝብ የግላዊነትና እራስ ወዳድነት በሽታ ሳይፈትነው፣ በርሱ መኖር ውሰጥ ብቻ ሳይሆን በሞቱም ጭምር የሌሎችንም ህልውና ያሰበ፣ ህይወት እየተከፈለ ለዘመናት እየፈሰሰ ከመጣው የኢትዮጵያ የአንድነትና የነጻነት የታሪክ በደም የተዋጀ የማየነጥፍ ድርሻ ያበረከተ ብርቱና ኩሩና ጀግና ህዝብ ነው፡፡ ይህ የአማራ ህዝብ አንጡራ ታሪክ የሆነው በጋራ ታሪክ የመስራት፣ አብሮ የመኖር፣ ቤት ዘግቶ ያለመብላት፣ በጋራ የማጌጥና ሲጨንቅም ጋሻ መከታ የመሆን ስብዕና በጀመርነው የለውጥ ጉዞና ከፊት ለፊታችን በቅርብ እርቀት አሻግረን በምንመለከተው የሃገራችን የታላቅነትና የስልጣኔ ዘመንም በአማራ ታሪክ ተረካቢ ጀግናና አስተዋይ ልጆቹ ተጠናክሮ እንደሚቀጥል ባለሙሉ ተስፋ ነኝ፡፡
ድርጅታችን በአዴን የዲሞክራሲ ጭላንጭል በጠፋበት፣ አፈና በበረታበት፣ ስለግልም ሆነ ስለጋራ መብትመታገልና መሟገትእንደ ኃጢአት መቀጠርና ህይወት በጅምላ ማስከፈል በጀመረበት በዚያ ከፉና ጨለማ ዘመን ተወልዶ ታሪክ እየሰራ የመጣ የአማራ ህዝብ ብቻ ሳይሆን የሌሎች ህዝቦችም ጭምር ባለውለታ ድርጅት ነው፡፡ ብአዴን የአማራ ህዝብ ባሰለፈው ረጅም የትግልና የድል ዓመታት ውሰጥ ቀን ሲጨልም ብርሃን ሆኖ መንገድ በመምራት፣ ሲቀዘቅዝ ነዶ በማሞቅ፣ ለአዘኑና ለተከዙ መጽናኛ፣ መኖር ለተሳናቸው ህይወት ከፍሎ ህይወት የዘራ አይረሴ ታሪክ ያለው ድርጅት ነው፡፡ በአንጸባራቂው የድል እና የውጤት ጉዞው ውሰጥ እንደማንኛውም የሰወች ስብስብ ድርጅት ብአዴን የፈጸማቸውን ስህተቶች በመደማመር ትልቁን ስእል ትንሽ አድርገው የሚያሳዩ መነጸሮች እንዲስተካከሉ በዚህ አጋጣሚ እናገራለሁ፡፡
የተከበራችሁ የዚህ ጉበዔ ተሳታፊዎች!
በዚህ በተወሳሰበው የሰላም፣ የዲሞክራሲ፣ የልማትና መልካም አስተዳደር የትግል ምዕራፍ ውሰጥ የአማራ ህዝብ ከስሜት እና ከሞቅ ሞቅ የጸዳ፣ እኔ አውቅላችኋለውን ያስወገደ፣ አካታች፣ አስተዋይና አርቆ አሳቢጥበበኛ መሪና አታጋይ ድርጅት ይፈልጋል፡፡ ዘመኑ ፖለቲከኞች እርስበርስ የምንነቋቆርበትና አንዳችን ለሌላችን የቤት ሥራ የምንሆንበት ሳይሆን ተደጋግፈን፣ አነተ ትብስ አንተ ትብስ ተባብለን፣ ሁላችንም ከተንኮል፣ ከቂም፣ ከጥላቻ እና አሉባልታ እርቀን የጀመርነውን የለውጥ ጉዞ በተባበረ ክንድ ዳር የምናደርስበት ሊሆን ይገባል፡፡
የአማራ ህዝብ ያልተመለሱ እና በፍጥነት ሊመለሱ የሚገባቸው ጥያቄወች አሉት፡፡ የክልሉ ሰላም ከሞላ ጎደል መረጋጋት እየታየበት ቢገኝም በአግባቡ መልክ ያልያዙ ጉዳዮች ያሉበት ነው፡፡ ዲሞክራሲያችን በእድልም በፈተናም የተከበበ ነው፡፡ የልማት፣ የፍትሃዊ ተጠቃሚነት፣ አስተማማኝ የኑሮ መሰረት የሆነ የስራ እድል የመፍጠር ጉዳይ የወቅቱ መሰረታዊ የህዝብ ጥያቄወች ናቸው፡፡ በአዴን እነዚህንና ሌሎች ያልተመለሱ የአማራ ህዝብ ጥያቄወችን በመመለስ የመጨው ዘመን የአማራ ህዝብ እውነተኛ የፖለቲካ ፓርቲ ሆኖ ለመውጣት አዲስ ፍላጎት፣ አቅምና ተነሳሽነት ገንብቶ የአዲሱን ዘመን ጉዞ ምዕራፍ አንድ ብሎ ለመጀመር በዝግጅት ለይ የሚገኝ መሆኑን በዚህ ታሪካዊ ጉበዔ ሳበስራችሁ በኩራት ነው፡፡ ድርጅታችን ብአዴን ባሳለፋቸው የትግልና የድል ዓመታት ያዳበረውን ህዝብን የመምራትና የማስተዳደር ልምድ፣ ሰላምንና ጸጥታን የማስከበር ድፍረትና ጥበብ በአዲሱ ዘመን ከተጎናጸፈው የለውጥን መንገድ በትክከለኛ አቅጣጫ የመዘወር ብቃትና ተሰጥዖ ጋር አዋህዶ በመጠቀም የአማራን ህዝብ ችገሮች የመፍታትና በትልቁ የሃገራችን የለውጥ ጉዞ ውስጥም ሁነኛ ድርሻ ይዞ የመዝለቅ ትክክለኛ አቋም ለይ ይገኛል፡፡
ክልላችን ብሎም መላ ሃገራችንን ያጥለቀለቀው አዲሱ የለውጥ ብርሃን እርስ በርስ አተያየን እንጅ ገና በውስጡ አልተመላለስንበትም፡፡ እንለወጥ ስንል ምክንያት አለን፡፡ እምንለወጠው የህዝባችንን ተጨበጭ ችግሮች በዘላቂነት ፈትተን ክልላችን ለኛ፣ ለልጆቻችንና ለልጅልጆቻችን የተመቸ እንዲሆንና የጨለማው ዘመን ምዕራፍ እስከወዲያኛወ ተዘግቶ አዲስ የተስፋ ጸዳል እንድነጎናጸፍ ነው፡፡ የጀመርነው ለውጥ በአንድ ጀመበር ታይቶ እሚጠፋ እንዲሆን አንሻም፡፡ በዓለም እንደኛ ተመሳሳይ እድል አግኝተው ሳይጠቀሙበት የቀሩ ሃገሮች ቁጥራቸው ቀላል አይደለም፡፡ በአንጻሩ ደግሞ የተገኘውን አጋጣሚ በሚገባ በመጠቀም የህዝባቸውን ችግር ከስር መሰረት በመፍታት ታሪክ ከሰሩ ብልህ ሃገራትትምህርት መውሰድ ይገባናል፡፡ ለውጥ ድጧቸው ያለፉትም ሆኑ ለውጥ ትንሰኤያቸውን ያረጋገጠላቸው ሃገራት የስኬትም ሆነ የውድቀት ምስጢር ለውጥ ከተመራበት ሁኔታ ጋር የሚታይ ነው፡፡ የኛ የለውጥ ጉዞ የተሳካ እንዲሆንና ፍሬ እንዲያፈራ ካስፈለገ እንቅስቃሴው መሰረት እንዲይዝ (ጥልቀት እንዲኖረው)፣ ሥርዓት ባለው መንገድ እየተመራ እነዲሰፋና ቀጣይነት እንዲኖረው ማድረግ ጠገቢ ነው፡፡ በዚህ ረገድ ብአዴን ለውጡ ግልጽ ግብ ተቀምጦለትና የሚመራበትም አቅጣጫ በሚገባ ተቀምጦለት እንዲጓዝ በጽናት ይሰራል፡፡ ከሁሉ በላይ የለውጥን ቀጣይነት የሚያረጋግጠው ተቋማዊ ይዘት እንዲኖረው ማድረግ መቻል ነው፡፡ ተቋማት በግለሰብ ስብዕና እና ብቃት ለይ ብቻ የተመሰረተና ግለሰቦች ሲኖሩ የሚኖር ሲጠፉ የሚጠፋ ሥርዓት እንዳይኖር ሁነኛ መድሃኒት ሆነው ያገለግላሉ፡፡ ያም ሆኖ የግለሰቦች ብቃት በተቋም ግንባታ ሂደት ውሰጥ የሚኖረው ስፍራ የሚናቅ አለመሆኑን ብአዴን አሳምሮ ይገነዘባል፡፡ ስለሆነም እራሱን በጥልቀት ፈትሾ በማጥራት በተለይ እስካሁን ተዘንግተው የቆዩትን የህ/ሰብ ክፍሎች ጭምር በመዳሰስ ብቃት ያላቸው፣ የተማሩ፣ ድርጅታዊ ስብእናቸው የተጠበቀ ወጣት አመራሮችን የማሰባሰብ፣ የመገንባትና የማሰማራት ስራ የብአዴን የዚህ ወቅት ትልቁ ተልኮ ሆኖ ይሰራል፡፡
በክልላችን ሰላምን የማስጠበቅና የማስከበር ተልዕኮ አሁንም አስተማማኝ ደረጃ ለይ አልደረሰም፡፡ ተከምሮ የቆየው ያልተፈታ ችግር የወለደው ብሶት ከስሜተኝነትና ከሆደ ባሻነት ጋር ተዳምሮ በዛም ለይ ቆሰቋሾች ተጨምረውበት የለውጥ ጉዞአችን ወደ አልሆነ አቅጣጫ እንዲጓዝ እየተፈተነ ነው፡፡ ብአዴን በትክክልና በተረጋጋ መንፈስ እያሰበ በክልሉን ችግሮች አፈታት ለይ የሚረባረብበት ጊዜ ያስፈልገዋል፡፡ ብአዴን ከዘብ ጠባቂነት ወጥቶ ህዝብ ያነሳቸውን ጥያቄወች ለመመለስ ሌት ተቀን የሚሰራበት እድል ሊሰጠው ይገባል፡፡ ስለሆነም ሁላችንም በተሰማራንበት አካባቢ ሁሉ ሰላምን፣ ይቅርታንና ፍቅርን የህይወታችን መመሪያችን በማድረግ ለህዝባችን ተጠቃሚነት ከጊዜ ጋር እሽቅድድም ውስጥ መግባት ይኖርብናል፡፡ ወጣቶች በየአካባቤያችሁ የጀመራችሁትን ለውጥን በባለቤትነት የመጠበቅ ተልዕኮ አጠናክራችሁ ነገር ግን በችኮላ ሳይሆን በማስተዋልና በተረጋጋ መንፈስ፣ እርስ በርስ በመጠላላት ሳይሆን በፍቅርና በመተሳሰብ፣ በመለያየት ሳይሆን በአንድነት ሰሜት፣ እኔ ያልኩት ብቻ ይሁን ከማለት ይልቅ በአመክንዮና በሃሳብ የበላይነት ለይ በተመሰረተ የመተማመን ግንኙነት ክልላችሁንና ሃገራችሁን እንድታገለግሉ በድጋሜ ጥሪ አቀርብላቸኋለው፡፡ የተወሳሰበውን ችግራችንን በአጭር ጊዜ መፍታት እምንችለው በፍቅርና በስራ ብቻ እነደሆነ ልነግራችሁ እወዳለሁ፡፡
ብአዴን እራሱን እያጠራና ውሰጡን እየገነባ የአማራ ህዝብን ችግሮች ለመፍታት የሚያደርገውን ጉዞ በጽናት ይቀጥላል፡፡ ይሁን እንጅ ይህ ከባድና ውስብስብ ተልዕኮብቻን በሚደረግ ጉዞ ሊሳካ የሚችል አይደለም፡፡ ስለሆነም ከአጎራባች ክልሎች ህዝቦች፣ ከፖለቲካ ፓረቲዎችና ከመላ የሃገራቸን ህዝቦች እንዲሁም ከተፎካካሪ ፓረቲዎችም ጋር ተቀራርቦና ተባብሮ ይሰራል፡፡ በአንድነት፣ በፍቅርና በመተሳሰብ ጥልቁን ገደል እንሻገረዋለን፡፡ ዘመኑ ልብ ለልብ የምንደማመጥበትና ተባብረን ታሪክ የምነሰራበት ብሩህና ተስፋ የተሞላበት ነው፡፡ እንጠቀምበት፣ ተባብረን ወደከፍታ እንውጣበት! የጨለመ መስሎ እሚታየን እየነጋ ስለሆነ ነው፡፡
በመጨረሻ ጓድ ደመቀ መኮነን የብአዴን ሊቀ መንበር ጉበኤውን በንግግር እንዲከፍቱልን በአክብሮት እጋብዛለሁ፡፡
አመሰግናለሁ!

 

 

 

 

 

 

 

 

 

 

 

በብአዴን ሊቀመንበር ጓድ ደመቀ መኮንን 12ተኛ ድርጅታዊ ጉባኤ የቀረበ መክፈቻ ሙሉ መልዕክት
~~ባህር ዳር መስከረም 17፣ 2011 ዓ.ም~~
~~~~~~~~~~~~~~~~~

Ø ውድ የብሄረ አማራ ዴሞክራሲያዊ ንቅናቄ - 12ተኛ ድርጅታዊ ጉባኤ ተሳታፊዎች!
Ø የተከበራችሁ የድርጅታችን አባላትና ደጋፊዎች
Ø የተከበራችሁ የእህት እና አጋር ድርጅቶች አመራሮች እና ተወካዮች፤
Ø የተከበራችሁ የክልላችን እና መላው የኢትዮጵያ ህዝብ
Ø ጥሪ የተደረገላችሁ እንግዶች
Ø ክቡራትና ክቡራን!

ድርጅታችን ብአዴን 12ተኛውን ጉባኤ የሚያካሄድበት ወቅት ልዩና ታሪካዊ ነው፡፡ ብአዴን የ-38 ዓመታት ጉዞውን መለስ ብለን ስናይ ያለፋቸውን የስኬት እና የፈተና ጊዜያት ማስታወስ ይገባል፡፡

ድርጅታችን ብአዴን የማይታለፉ ይመስሉ የነበሩ የፈተና ጊዜያትን በተለመደው ፅናቱ እየተሻገራቸው ለተሻለ ምዕራፍ መነሻ እያደረጋቸው ዘልቋል፡፡

ብአዴን ለአማራና ለመላው የሃገራችን ህዝብ የትግል መነሻ እና መንደርደሪያ በመሆን ክፉውንም በጎውንም በትዕግስት፣ በአስተዋይነትና በጥበብ በማለፍ ለአሁኑ የለውጥ ተስፋ የበቃ አንጋፋ ድርጅት ነው፡፡

ብአዴን ኢትዮጵያ ፈተና በገጠማት ጊዜ ሁሉ ከእህት እና አጋር ድርጅቶቹ ጋር በመሆን ከራስና ከድርጅት በላይ ሃገርን አስቀድሞና አሻግሮ በማየት ህዝብና ሃገርን የመታደግ የካበተ ልምድ ያለው ድርጅት ነው፡፡

እነሆ ድርጅታችን ብአዴን! አሁን ለበቃንበት የሰላም፣ የይቅርታና የፍቅር እንዲሁም የነፃነት ተስፋ መለምለም የተጫወተው ሚና ጉልህ የነበረ መሆኑን በዚህ ታሪካዊ ጉባኤተኛ እና መላው የክልላችንና የሃገራችን ህዝብ ፊት ቆሜ ስመሰክር የሚሰማኝ ክብርና ሞገስ ከፍ ያለ መሆኑን ልገልጽላችሁ እወዳለሁ፡፡

Ø ውድ የጉባኤው ተሳታፊዎች!
Ø ክቡራትና ክቡራን!  ’’  ’’ 

የአማራ ሕዝብ ሃገራችን ኢትዮጵያን ወቅቱ የሚጠይቀውን ዋጋ ሁሉ ከፍለው ከገነቡ ጠንካራ ሕዝቦች መካከል አንዱ ሲሆን በኢትዮጵያ ታሪክ ውስጥ ገድሉን በማይፋቅ ቀለም የጻፈ ሕዝብ ነው፡፡

ኢትዮጵያ ስትጀመር አብረን ጀምረናል፤ ስትሠራ ሠርተናል፤ ስትሰለጥን ሠልጥነናል፤ ስታሸንፍ አሸንፈናል፤በዘመናት በተለያዩ ችግሮች ስትወድቅ አብረን ወድቀናል፤ ከቁልቁለት ጉዞ ለመውጣት ተስፋ ሰንቃ ስትነሳ አብረን በተስፋ ተነስተናል፡፡

እኛ በሌሎች ደምና ስጋ ውስጥ እንዳለን ሁሉ፤ ሌሎችም በእኛ ደምና ስጋ ውስጥ ይኖራሉ፡፡ እንዲህ ሆነን "ኢትዮጵያ" የምትባል ታላቅ ሃገር መገንባታችን ያኮራናል፡፡ ታላቅና ገናና የነበረችው ሃገራችን ድህነትና ኋላቀርነት መገለጫዎቿ መሆናቸው ደግሞ አንገታችን ያስደፋናል፤ ያሳፍረናል፤ ያስቆጨናል፡፡

ቁጭታችን እልህ ወልዶ ይህችን ገናና አገር ወደ ክብሯ ለመመለስ ከድህነትና ኋላቀርነት ጋር ትግል በመጀመራችን የተስፋ ፍንጣቂዎችን ማየት ጀምረናል፡፡ ይህ እንደተጠበቀ ሆኖ በስኬቶቻችን ውስጥ ድክመቶች በማሳየታችን ህዝባችንን ቅር አሰኝተን ወደ ግጭትም ገብተናል፡፡ ግጭቶቹም ዋጋ አስከፍለውናል፡፡

በህዝባችን ውስጥ ቅሬታ ከፈጠሩና ወደ ችግር ካስገቡን ችግሮች ለመላቀቅ ባደረግነው ትግል ተስፋ ያዘለ ለውጥ ማየት ጀምረናል፡፡

የጀመርነው የለውጥ ጉዞ በከፍተኛ ትግልና መስዋዕትነት የመጣ፣ ወደፊትም ብርቱ ትግልና ፅናትን የሚጠይቅ መሠረታዊ የለውጥ ጉዞ ነው፡፡

ይህ ለውጥ የጎደለንን የምንሞላበት፣ ያረጀውን የምናድስበት፣ ያዘመመውን የምናቃናበት፣ የጀመርነውን ዳር የምናደርስበት ስር-ነቀል ጉዞ ነው፡፡

ይህ ለውጥ በከፍተኛ ትግልና መስዋዕትነት የመጣ ሲሆን ምንጩም “እንቁላል ከውስጥ ሲሰበር ህይወት፤ ከውጭ ሲሰበር ሞት ያመጣል” እንደሚባለው ከህዝባችን እና ከድርጅታችን ውስጣዊ ፍላጎት የመጣ ከመሆኑም በላይ ከፍ ያለ አስተዋይነት፣ የሃላፊነት መንፈስ እና የጥንቃቄ ጉዞን የሚጠይቅ የለውጥ መንገድ ነው፡፡

የእኛ የለውጥ እንቅስቃሴ መሠረቱ ውስጣዊ ነውና፤ አንዱን አፍርሶ ሌላ ፍለጋ የሚሄድ ባለመሆኑ ክልላችንም ሆነ ሃገራችን ፈርሶ መሰራትን አይሹም፤ በተግባርም አያስተናግዱም፡፡

እያንዳንዱ ስርዓት የየራሱን ስኬትም፤ ውድቀትም፤ ልማትም፤ ጥፋትም አስተናግዶ አልፏል፡፡ እዚህ ላይ ዋናው ቁም ነገር ከስኬትም፤ ከውድቀትም ትምህርት መውሰድ ነው፡፡

ከእንግዲህ ብልህ መሆን ያለብን… ስኬቱን በማብዛት፤ ጥፋቱን ደግሞ በማረም ለተንጣለለ ድል ቆርጦ መነሳት ነው፡፡ በሰለጠነው ዘመን አካሄዳችን በኃይል አስገዳጅ ከመሆን ይልቅ በሃሳብ ልዕልና አስረጂና አሳማኝ መሆን ይኖርበታል፡፡

Ø ውድ የጉባኤው ተሳታፊዎች!
Ø ክቡራትና ክቡራን!

እያንዳንዱ ወቅትና ዘመን "አርበኝነትን" ይጠይቃል፤ ለዚህ ትውልድ የ"አርበኝነት" ብያኔ ድህነትን ከልብ መጠየፍ እና በልማት ድል መንሳት ነው፡፡ በዚህ የለውጥ ዘመን አርበኝነት ጥላቻን በፍቅር፤ ቂም-በቀልን በይቅርታ፤ መከፋፈልና መናቆርን በመቻቻልና በመደመር መሻገር ነው፡፡

እኛ የዛሬዎቹ ትውልድ ባለቤቶች፣ ለቀጣዩ ትውልድ የምናወርሳት ሀገር፣ ለዜጎቿ የተመቸችና የበለፀገች ትሆን ዘንድ ይህንን የአርበኝነት ታሪካችንን የምናሳየው ከድህነት እና ኋላቀርነት ጋር በምናደርገው ፍልሚያ ነው፡፡

ሀገርን መውደድ እና ማንነትን ማክበር፤ ድህነትን አዝሎ ግንጥል ጌጥ ነው፡፡ የድህነትና የኋላቀርነት ባሪያ ሆኖ ነፃነት የለም፡፡ አሁን የደረስንበት ምዕራፍ ብዙ ተጉዘን የመጣንበት ቀጥሎም ረጅም ጉዞ የሚጠይቀን ወሳኝ ወቅት ነው፡፡ ከፖለቲካው አንፃር ዛሬም ሀገራችን በሁለት ፅንፈኛ ሀይሎች መካከል በተወጠረ ፖለቲካ ውስጥ ትገኛለች፡፡ ክልላችንም የዚህ ዓይነተኛ መገለጫ ሆኖ ይታያል፡፡

በአንድ በኩል ሁሉን የደፈጠጠና የጨፈለቀ ልሙጥ ሀገራዊ ማንነትን ብቻ አንግቦ የተነሳ ጠቅላይና አሃዳዊ አመለካከት የኢትዮጵያን መልከ-ብዙ ዕውነታ በካደ ደረጃ ፅንፍ ይዞ እየተራገበ ይገኛል፡፡

በሌላ በኩል ብሄረሰባዊ ማንነትን ከሌሎች መነጠያና ማግለያ ያደረገ እና ፅንፈኛ ብሄርተኝነት በሚቀነቀንበት ወቅት ላይ እንገኛለን፡፡

የአማራ ህዝብ ሁሉን ደፍጣጩን እና ጨፍላቂውን ልሙጥ ማንነት እንዲሁም ከሌሎች የሚነጥለውንና የሚያገለውን ራስን ከልክ በላይ የሚያወድስ ማንነትን የሚሸከም ትከሻ የሌለው በእኩልነት የሚያምን ከሌሎች ጋር ወዶ እና ፈቅዶ ተሳስሮ የኖረ ህዝብ ነው ብሎ ብአዴን ያምናል፡፡

በመሆኑም ይህንን የመሰለውን መገለጫ ባለቤት የሆነውን የአማራን ህዝብ የሚመራው ድርጅታችን ብአዴን በእነዚህ ሁለት ፅንፎች መሀል ሚዛን ሆኖ የመቆም ኃላፊነቱን በብቃት መወጣት የሚጠይቀው ወሳኝ ወቅት ላይ ይገኛል፡፡

Ø ውድ የጉባኤው ተሳታፊዎች!
Ø ክቡራትና ክቡራን!

የምንሮጠው ሩጫ ከችግሮቻችን ፍጥነትና ዐቅም በላይ መሆን አለበት፡፡ ይህንን ነጻነት ወዳድ፣ ኩሩ፣ ጀግና፣ ማንንም የማያገልና ለማንም የሚሞት፣ የራሱን የማይሰጥ፣ የሰው የማይነካ ሕዝብ . . . በድህነት ውስጥ ሲማቅቅ እንደማየት ያለ አንገትን የሚያስደፋ ሐፍረት የለም፡፡

አሁንም ሕዝባችን በትዕግሥት እየጠበቀን ነው፡፡ ጊዜ ሰጥቶናል፡፡ ተሥፋ አልቆረጠብንም፡፡ ከስህተቶቻችን እንድንታረም፤ እሱን ሆነን፤ እሱን መስለን እንድንመራው ይፈልጋል፡፡ በአሁኑ ወቅት ብአዴን እኔን ሆኖ እኔን መስሎ ተጠናክሮ ይወጣልኛል ብሎ ህዝባችን ትልቅ ተስፋ ጥሎብናል፡፡

ይህ አጋጣሚ እኛን የመሰሉ ድርጅቶች ሁልጊዜ የሚጎናፀፉት ፀጋ ሳይሆን ስንት ውጣ ውረድ አልፈው የሚያገኙት ብርቅዬ ዕድል ነው፡፡ ስለሆነም ለመላው የድርጅታችን አባላት ለህዝባችን በትዕግስቱና በተስፋው ልክ እንሠራለት ዘንድ ወገባችንን አስረን እንድንነሳ በዚህ ታሪካዊ መድረክ ላይ ቆሜ ጥሪዬን ሳስተላልፍላችሁ በታላቅ ትህትና እና አክብሮት ነው፡፡

Ø ውድ የጉባኤው ተሳታፊዎች!
Ø ክቡራትና ክቡራን!

ብዙ ወጣ ገባ መንገዶችን አልፈን፤ ውጣ ውረዶችን ተሻግረን የምናካሂደው ይህ 12ተኛው ድርጅታዊ ጉባኤያችን የመጣንበትን መንገድ በጥልቀት በማስተዋል የምንማርበት፤ ቀጣዩን ጎዳና በግልፅ የምናመላክትበት ሊሆን ይገባል፡፡

ብአዴን ለአማራ ህዝብና ለመድረኩ የሚመጥን ቁመና ተላብሶ ለውጡን ለማስቀጠል፤ በየደረጃው በአዳዲስ ትውልድ የተገነባ አመራር መገንባት ይጠይቀዋል፡፡ ይህ ጉባኤ ከዚህ አኳያ ከፍተኛ ሃላፊነት ይጠበቅበታል፡፡

አሁን እዚህም እዚያም የምናያቸው ችግሮችና ፈተናዎች ከአሮጌው ለመላቀቅና አዲሱን ለመገንባት በምናደርገው ትግል ውስጥ የተከሠቱ፤ በአሮጌውና በአዲሱ መካከል በተፈጠረ ቅራኔ የተወለዱ ናቸው፡፡ እርግጠኞች የምንሆነው አዲሱ ማሸነፉ አይቀሬ መሆኑን ነው፡፡

አዲሱ እንዲያሸንፍ፣ ለውጡም ሕዝባችን የሚፈልገውን ዴሞክራሲ፣ ፍትሕ፣ ነጻነትና እኩልነትን እንዲያረጋግጥ ከተፈለገ መወጋገዙን ትተን መተጋገዝ፣ መጠላለፉን ትተን መተቃቀፍ፣ መሰባበሩን ትተን መተባበር፣ መጀመር አለብን፡፡

ወደፊት እንመልከት ስንል!? የትናንት ችግሮች ዛሬን ተሻግረው ማደናቀፍ አይችሉም ማለታችን አይደለም፡፡

ስልጣንን የጠባብ ፍላጎት ማርኪያ፣ ቡድናዊ መክበሪያ አድርጎ መገልገልን ዘላለማዊ ይሆን ዘንድ የሚሹ ወገኖች ተኝተው እንደማያድሩ የታወቀ ነው፡፡
ያለፈን ቀን ርቆ መሄድ የሚቻለው ፍጥነትን በመጨመርና ወደፊት በመሮጥ እንጂ ከቆሞ ቀር አስተሳሰብ ጋር በመነታረክ አይደለም፡፡

በዚህ አጋጣሚ በበርካታ መስዋዕትነትና ህዝባዊ ትግል ዕውን እየሆነ ባለው ዴሞክራሲያዊ መድረክና የለውጥ ጉዞ ጥሪ ተደርጎላችሁ ወደ ሀገራችንና ወደ ክልላችን ለገባችሁ ተፎካካሪ ፓርቲዎችም “ጉዟችን ወደፊት ይሁን” የሚለው መልዕክታችን ለእናንተም ይድረሳችሁ!
አቅጣጫችን ወደፊት ይሁን፡፡ “ወደፊት መውደቅም መንገድ መቀነስ ነው” ይላል ያገር ሰው፡፡ አነሰም በዛም ትርፍ የሚገኘው ወደፊት ከመጓዝ ነው፡፡

መድረኩን የሚመጥን ተራማጅና ዲሞክራሲያዊ አስተሳሰብ የሁላችንም ሀብት ይሆን ዘንድ የየድርሻችንን እንድንወጣ እያሳሰብኩ ብአዴንም ለዚህ ዝግጁ መሆኑን ላረጋግጥ እወዳለሁ፡፡

Ø ውድ የጉባኤው ተሳታፊዎች!
Ø ክቡራትና ክቡራን!

የሚቀረን ብዙ ቢሆንም ባለፉት ሁለት አስርት አመታት ያከናወንናቸው ተግባራት ጥሩ መነሻ ሆነው የሚወሰዱ ናቸው፡፡

ይህ እንደተጠበቀ ሆኖ ልንሰራ ሲገባን ያልሰራነው በጣም ብዙ ተግባር አለ፡፡ ለወጣቶቻችን የስራ ዕድል መፍጠር ገና ያልወጣነው አቀበት ነው፡፡

መልካም አስተዳደርን ማስፈን፣ የፍትህ ጥማትን ማርካት፣ የዲሞክራሲ ምህዳሩን ማስፋት ሕዝባችን ከእኛ በአፋጣኝ እየጠየቃቸው ያሉ የለውጥ አጀንዳዎቻችን ናቸው፡፡

ለውጡ ድንበር የለሽ ነው፡፡ ብአዴናዊ፣ ኢህአዴጋዊ፣ ሕዝባዊ እና ሕገ-መንግስታዊ ስፋትን ይዞ ይቀጥላል፡፡

ይህ ታሪካዊ ጉባኤ ብአዴን በዚህ ሂደት ውስጥ የለውጡ መሪ ሆኖ የሚወጣበትን አቅጣጫ የሚያላብሱ ውሳኔዎችን ተወያያቶ እንደሚያሳልፍ፤ እንዲሁም የአስተሳሰብ አንድነት በመገንባት ለውጡን በሚጠበቀው ከፍታ የሚያስቀጥሉ እና በቅርብ በሞት እንዳጣነው እንደ ጓድ ተስፋዬ ጌታቸው ዓይነት ለእውነትና ለፍትህ በጽናት የሚቆሙ አመራሮችን እንደሚሰይም ፅኑ እምነቴ ነው፡፡

በመጨረሻም ወደ 12ኛው ድርጅታዊ ጉባኤና ወደ ደማቋ ከተማችን ባህር ዳር እንኳን ደህና መጣችሁ፤ ለክርስትና እምነት ተከታዮች እንኳን ለብርሃነ መስቀሉ በሰላም አደረሳችሁ እያልኩ፤ ታሪካዊና አስደሳች ቆይታ እንዲሆንላችሁ በመመኘት የጉባኤውን መከፈት በይፋ አበስራለሁ፡፡

የለውጡ ቀጣይነት ለአማራ ህዝቦች ተጠቃሚነትና ዴሞክራሲያዊ አንድነት!
ክብርና ሞገስ ለትግሉ ሰማዕታት
ድልና ድምቀት ለ12ተኛ ድርጅታዊ ጉባኤያችን
አመሰግናለሁ!

 

ረጅም ርቀት መጓዝ የሚቻለው በህብረት ነው

አሜን ተፈሪ

ገዢው ፓርቲ ኢህአዴግ በየጊዜው የሚያጋጥሙትን ችግሮች የመፍታት የዳበረ ልምድ ያለው ድርጅት ነው፡፡ ህልውናን የሚፈታተኑ ከባባድ ችግሮች ሲገጥሙት፤ በአስተዋይነት፣ በሩቅ አሳቢነት፣ በህዝባዊነት መርህ እየተመራ አደጋዎቹን ተራ በተራ እየተሻገረ በድል ጎዳና ተጉዟል፡፡ በመሆኑም የሐገሪቱ ልማት ስጋት የፈጠረባቸው ጠላቶች እና የኢህአዴግን ውድቀት የሚመኙ የሥልጣን ተስፈኞች ምንም ቢሉ ምን፤ ኢህአዴግ በአሁኑ ሰዓት ያጋጠሙትን ችግሮች ፈትቶ የህዳሴ ጉዞውን እንደሚቀጥል ለአፍታም ጥርጣሬ ሊገባን አይገባም፡፡

 

በርግጥ፤ ከድርጅቱ ታሪክ እና ባህርይ በማይጣጣም መልኩ፤ አሁን ያጋጠመውን ችግር በመፍታት ረገድ ያሳየው ዳተኝነት እና መፋዘዝ በህዝቡ ዘንድ ‹‹ኢህአዴግ ይህን ችግሩን ይፈታው ይሆን?›› የሚል ጥርጣሬን መፍጠሩ አልቀረም፡፡ ህዝቡም ችግሩ ይፈታል በሚል በከፍተኛ ትዕግስት ያደረገው ጥበቃ፤ ከተለመደው በላይ የሆነ ጊዜ በመውሰዱ ብቻ ሳይሆን፤ ችግሮቹ ይበልጥ ሥር እየሰደዱና እየተነባበሩ ሲከመሩ በማየቱ ሥጋት ገብቶታል፡፡ ሥጋቱም ተገቢ ሥጋት ነው፡፡ እንኳን ህዝቡ አንዳንድ የድርጅቱ ነባር አመራሮችም ወደ ተስፋ መቁረጥ እንዲገፉ ያደረገ ከባድ ችግር መሆኑም የሚካድ አይደለም፡፡ ነገር ግን መላው የሐገራችን ህዝቦች በሆደ ሰፊነት ድርጅቱ ችግሮቹን እንዲያርም ዕድል ሲሰጡት፤ በረጅም የትግል ጉዞ ያካበተውን ልምዱን በመጠቀም ያጋጠመውን ችግር ለማረም የሚያስችል ሁኔታ እንደሚጥር ለመገመት ይቻላል፡፡ በተለይም ባለፉት ሁለት ወራት በተለየ ኃይል እና ትኩረት ችግሮቹን መፈተሽ መጀመሩን ስንመለከት፤ ኢህአዴግ ያጋጠሙትን በርካታ ችግሮች በማስወገድ ወደ ትክክለኛው ጎዳና ለመመለስ እንደሚችል እርግጠኛ ሆነናል፡፡

 

ኢህአዴግ በርካታ ችግሮችን እየተሻገረ የመጣ ድርጅት ብቻ ሳይሆን፤ አሁንም የሚያጋጥሙትን ትክክለኛ የችግሮች አፈታት ስልት በመጠቀም ችግሮቹ እንደ ሐገር የከፋ ጉዳት ላይ ሳይጥሉን ያስወግዳቸዋል ብለን እንድንተማመን አድርጎናል፡፡ አሁን እንደ ቀድሞው ችግሮቹ ብዙ ጉዳት ሳያደርሱ ለመፍታት ያልቻለበት ሁኔታ ቢከሰትም፤ ከድርጅቱ ታሪክ የምንረዳው፤ ህልውናውን የሚፈታተኑ ፈተናዎች ሲያጋጥሙት ሰፋፊ የእርማትና የተሃድሶ ንቅናቄዎችን በማካሄድ ስር ነቀል መፍትሔ በመስጠት በድል ጎዳና የሚጓዝ ድርጅት መሆኑን ነው፡፡  

 

ስለሆነም፤ ኢህአዴግ አሁን የያዘውን የእርማትና የተሃድሶ ንቅናቄ በተለመደው ቁርጠኝነት እና ትጋት መያዝ ይኖርበታል፡፡ ኢህአዴግ ይህንን ዕድል በዋዛ ፈዛዛ ሊያስመልጠው አይገባም፡፡ በዚህ ረገድ ችግር ከተፈጠረ፤ ሐገሪቱ ወደ ኋላ የምትሄድበትን ርቀት ለመገመት ያስቸግራል፡፡

 

ኢህአዴጎች የኢትዮጵያ የወደፊት ዕድል በእጃቸው ላይ እንዳለ በመገንዘብ፤ ይህን ዕድል አጥብቀው ሊይዙት ይገባል፡፡ በምንም ምክንያት በእጃቸው ባለው ዕድል ቁማር ሊጫወቱ አይገባም፡፡ በዚህ ረገድ መላ ህዝቡ፤ በተለይም ወጣቶች ትልቅ እገዛ ሊያደርጉለት ይገባል፡፡ ኢህአዴግም የሐገራችን ወጣቶች ሐገር የመረከብ ሚናቸውን በብቃት እንዲወጡ ለማስቻል እና ተጠቃሚነታቸውን ለማረጋገጥ ዛሬም እንደ ዱሮው የሚጠበቅበትን የመሪነት ሚና መጫወት ይኖርበታል፡፡

 

በሌላ በኩል፤ የወጣቶች የልማትና መልካም አስተዳዳር ፍላጎቶች ሊሟሉ የሚችሉት በሐገራችን ሰላምና የህግ የበላይነት የተረጋገጠበት ሁኔታ ሲኖር መሆኑን ወጣቶች እንዲረዱ ሰፊ ጥረት ማድረግ ይገባዋል፡፡ ሰላምና የህግ የበላይነትን በማረጋገጡ እንቅስቃሴ ወጣቶች ተሳታፊ እንዲሆኑ ጥሪ ከማቅረብ ባሻገር ተጨባጭ ሥራዎችን መስራትም ይገባዋል፡፡

 

በሌላ በኩል ወጣቱ ኑሮውን እንዲያማርር ያደረጉ ችግሮች እንዲፈቱለት መጠየቅ እና ጠይቆ  ያልተፈቱለት ችግሮች ሲገጥሙት በመንግስት ላይ ያሳደረውን ቅሬታ በአደባባይ ለመግለጽ ይችላል፡፡ ሆኖም ይህን ሲያደርግ አጋጣሚውን በመጠቀም ሐገሪቱን ለማፈራረስ የሚንቀሳቀሱትን አፍራሽ ኃይሎች ነቅቶ መከላከል ይኖርበታል፡፡

 

ኢህአዴግ፤ በአንድ በኩል የችግሩ ዋነኛ ምንጭ የሆነውን ውስጣዊ ድክመቱን ይዋል ይደር ሳይል መፍታት እና መላውን ህብረተሰብ እና ወጣቱን የመፍትሔው አካል በማድረግ ህዝብን ያስመረሩ ችግሮች በፍጥነት እንዲወገዱ መሥራት ይኖርበታል፡፡  

 

መንግስት የህዝቡን ቀጥተኛ ተሳትፎ የሚያረጋግጡ መድረኮችን መክፈት፣ በህዝቡና በመንግስት መካከል ከመቸውም ጊዜ በላይ መቀራረብና ጠንካራ ትስስር መፍጠር የሚያስችሉ የፖሊሲ፣ የአደረጃጀትና አሰራር ለውጥ እርምጃዎችን መውሰድ ይጠበቅበታል፡፡ በሌላ በኩል፤ ደግሞ ሐገሪቱን ለማተራመስ የሚደረግን ማናቸውንም አፍራሽ ድርጊት የመመከትና በመላ ሐገሪቱ ህግና ስርዓትን የማስከበር፣ የህግ የበላይነትንና ሰላምን የማስጠበቅ ኃላፊነቱን በብቃት መወጣት ይኖርበታል፡፡

 

በአሁኑ ወቅት የሚታዩት ሁከቶች በመሠረቱ ሳይፈቱ የቆዩት ችግሮች ድምር መገለጫዎች ናቸው፡፡ ስለሆነም፤ የተጀመረው ዕድገትና ተስፋ ሰጭ ጉዞ ሳይሰናከል ቀጥሎ ያልተፈቱት ችግሮች የሚፈቱበት ሁኔታ እንዲፈጠር እና የሐገሪቱ ሰላም እንዳይናጋ ሳይፈቱ የቆዩ ችግሮቻችንን በፍጥነት መፈታት ይኖርባቸዋል፡፡ ይህን በማድረግም በተለያዩ የህብረተሰብ ክፍሎችና በኢትዮጵያ ወዳጆች ዘንድ ስጋት የፈጠረው ችግር ከሥሩ ሊነቀል ይገባል፡፡ በዚህም ‹‹በርግጥ ችግሩ ይፈታ ይሆን?›› ከሚል ጥርጣሬ ህዝብን ማላቀቅ ይኖርበታል፡፡

 

አፍራሽ ኃይሎች ዋነኛ መሣሪያቸው ባደረጉት የማህበራዊ ሚዲያ በየደቂቃው በሚሰራጩት የፈጠራ ወሬ እና አሸባሪ መልዕክት ህዝቡ በቀላሉ እንዳይደናገር ማድረግ ያስፈልጋል፡፡ ኢህአዴግና መንግስት ህዝቡ እንዳይደናገር እና ትክክለኛውን ሁኔታ እንዲረዳ የማድረግ ሥራቸውን ማጠናከር ይኖርባቸዋል፡፡ እናም ትክክለኛ መረጃ በማድረስ ረገድ ያለው ችግር መፍትሄ ሊያገኝ ይገባል፡፡ 

 

ኢህአዴግና መንግስት፤ ‹‹በርግጥ ችግሩ ይፈታ ይሆን?›› የሚለው ጥርጣሬ እንዲወገድ የሚያደርግ እና ህዝቡን ከስጋት የሚያላቅቅ ተጨባጭ ስራ መስራት ያስፈልጋቸዋል፡፡ ስለሆነም ባንድ በኩል የችግሩ ዋነኛ ምንጭ የሆነው ውስጣዊ ድክመቱን ይዋል ይደር ሳይል መፍታት፤ በሌላ በኩል መላው ህብረተሰብና ወጣቱ የመፍትሄው አካላት መሆን የሚችሉበትን ሁኔታ ማረጋገጥ ይገባዋል፡፡

 

ታዲያ ይህን ለማድረግ መንግስት የህዝቡን ቀጥተኛ ተሳትፎ የሚያረጋግጡ መድረኮችን መክፈት፣  ይህንንም የሚያሳልጡ አስፈላጊ የሆኑ የፖሊሲ፣ የአደረጃጀትና የአሰራር ለውጦችን ማከናወን ይጠበቅበታል፡፡ እንዲሁም በመላ ሐገሪቱ ህግና ስርዓትን የማስከበር፣ የህግ የበላይነትንና ሰላምን የማስጠበቅ ኃላፊነቱን በብቃት መወጣት ይኖርበታል፡፡

 

የተጀመረው ዕድገትና ተስፋ ሰጭ ጉዞ ሳይሰናከል ቀጥሎ፤ ያልተፈቱት ችግሮች የሚፈቱበት ሁኔታ እንዲኖር እና የሐገሪቱ ሰላም እንዳይናጋ ለማድረግ ችግሮቻችንን በፍጥነት መፈታት ይኖርብናል፡፡ አሁን እንደ ሐገር ያጋጠመን ችግር፤ እጅግ የምሳሳለትን የሰላም፤ የልማት እና የዴሞክራሲ ስርዓት ግባንታ ሥራችንን በእጅጉ የሚያደናቅፍ ችግር ነው፡፡ አንዳንዶች ‹‹የምለኒየሙ ፈጣን ዕድገት›› ሲሉ የሚጠቅሱት የኢኮኖሚ ልማታችን ግለቱን እንደጠበቀ ግስጋሴውን ሊቀጥል ይገባል፡፡ ሐገሪቱ በማያቋርጥ የዕድገት ምህዋር ውስጥ እንድትገባ ማድረግ የቻለው ልማታዊ ዴሞክራሲያዊ መስመር ተጠብቆ እንዲዘልቅ፤ ተለዋዋጭ ሁኔታዎችን በጥልቀት መርምሮ እና ተረድቶ ብቁ አመራር መስጠት ያስፈልጋል፡፡

 

ዛሬ መንግስት እና መሪ ድርጅቱን እየተፈታተኗቸው ያሉት የተለያዩ ችግሮች መወገድ እና በአፍሪካ አህጉር የተነሳች ‹‹አዲሲቷ የአፍሪካ ነበር›› የሚል ስያሜ ያተረፈው ፈጣን ኢኮኖሚያዊ ዕድገታችን መቀጠል ይኖርበታል፡፡ ስለሆነም ከድህነት ወለል በታች ይኖሩ የነበሩ በሚሊየን የሚቆጠሩ ዜጎች ከድህነት አሮንቃ እንዲወጡ ማድረግ የቻለውን መስመር የሚያዛንፉ ተግዳሮቶች በአስቸኳይ እንዲወገዱ ድርጅቱ ጠንክሮ መሥራት ይኖርበታል፡፡  

 

ባለፉት ጥቂት ዓመታት በተደረገው ርብርብ፤ በዓለም የድህነት ሰንጠረዥ ከግርጌ ከሚሰለፉ ሦስት ሐገሮች አንዷ የነበረችውን ሐገራችንን፤ በአዲሱ ምለኒየም ፈጣን ዕድገት በማስመዝገብ ከሚጠቀሱ ሦስት ሐገሮች (ቻይና፣ ሚያንማር፣ ኢትዮጵያ) በሦስተኛ ደረጃ እንድትሰለፍ ማድረግ ተችሏል፡፡  የሐገራችንን ህዳሴ እውን ለማድረግ፤ መላ የሐገራችን ህዝቦች በጊዜ የለምን መንፈስ ያደረጉትን ሰፊ እንቅስቃሴ ያስተባበረው ኢህአዴግ፤ ዳግም ጽናት እና ህዝባዊነትን ተላብሶ አደራውን መወጣት ይገባዋል፡፡

ለያዝነው አጓጊ የህዳሴ ጉዞ እንቅፋት ሊሆኑ የሚችሉ መሰናክሎችን ለይቶ አዲስ ምዕራፍ ከፋች ውሳኔ በማድረግ እና ለተግባራዊነቱ በመንቀሳቀስ፤ ለሐገር እና ለህዝብ አለኝታ መሆኑን ማረጋገጥ ይኖርበታል፡፡ በተለያዩ አካባቢዎች እና በተለያዩ ጊዜያት በተከሰቱ ግጭቶች ሳቢያ ክቡር የሰው ህይወት መጥፋቱ፤ ዜጎች ከመኖሪያ ቀያቸው መፈናቀላቸው እና የዜጎች ሐብት እና ንብረት መውደሙ ያሳዘናቸው መሆኑን የገለፁት የድርጅቱ ሊቀመንበር እና የኢፌዴሪ ጠቅላይ ሚኒስትር ኃይለማርያም ደሳለኝ በቅርቡ እንደተናገሩት፤ ‹‹አሁን የሚታዩት እና የተለያየ መነሻ ያላቸው ችግሮች በፍጥነት ካልተወገዱ፤ እንደ ሐገር አሳሳቢ ወደሆነ ሁኔታ መግባታችን አይቀርም፡፡›› ስለዚህ ሐገራችን የተያያዘችውን የህዳሴ ጉዞ ሊያደናቅፍ የሚችለው ችግር በፍጥነት እንዲወገድ ሁሉም ዜጎች በአስተዋይ መንፈስ መሥራት ይጠበቅባቸዋል፡፡

ባለፉት ሃያ አምስት ዓመታት ትምህርትን በፍትሐዊነት ለማዳረስ እና የተማሩ ዜጎችን ቁጥር ለማሳደግ በማሰብ በተለያዩ የአገሪቱ አካባቢዎች ከ50 በላይ ዩኒቨርስቲዎች ተገንብተዋል፡፡ በመቶ ሺዎች የሚቆጠሩ ተማሪዎች በከፍተኛ ትምህርት ተቋማት ገብተው ትምህርታቸውን መከታተል የሚችሉበት ሁኔታም ተፈጥሯል፡፡ በእነዚህ የሐገር ተስፋ ተደርገው በሚታዩ የትምህርት ተቋማት የተከሰቱትን አስተዳደራዊ ችግሮች እና ተማሪዎች የሚያነሷቸውን ሌሎች ችግሮች በማዳመጥ መንግስት መፍትሔ ለማስቀመጥ የተለያዩ ጥረቶችን ሲያደርግ ቆይቷል፡፡  

አቶ ኃይለማርያም እንዳሉት፤ ‹‹በአሁኑ ወቅት በተጠቀሱት ዩኒቨርስቲዎች ተከስቶ የነበረው ችግር የክልል እና የፌዴራል መንግስታት፤ እንዲሁም የየዩኒቨርስቲዎች አመራሮች እና የየአካባቢው የመስተዳድር አካላት፤ ከተማሪዎች፣ ከሐገር ሽማግሌዎች፣ የሐይማኖት መሪዎች እና ከጸጥታ አካላት ጋር የተቀናጀ እንቅስቃሴ…›› ተደርጓል፡፡ ከፍተኛ የመንግስት ባለሥልጣናት ከማዕከል ወደ ተለያዩ አካባቢዎች ሄደው ከየዩኒቨርስቲ አመራሮች እና ተማሪዎች ጋር በመነጋገር ችግሮቹን ለማስወገድ ጥረት ተደርጓል፡፡ መንግስት  ሁኔታዎች ተረጋግተው መደበኛ መልካቸውን እንዲይዙ እና የመማር ማስተማር ሂደቱ እንዲቀጥል ሰፊ ጥረት ከማድረግ ባሻገር፤ አለመረጋጋቱን ሙሉ ለሙሉ ለማስወገድ የተለያዩ እርምጃዎችን ወስዷል፡፡ በዚህም ውጤት ተገኝቷል፡፡

በአጠቃላይ በከፍተኛ ትምህርት ተቋማትም ሆነ በሌሎች አካባቢዎች ዳግም የጸጥታ መደፍረስ ችግር እንዳይፈጠር፤ የዜጎች ህይወት ዋስትና እንዲያገኝ እና በዜጎች ሐብት እና ንብረት ላይ የሚደርሰው ውድመት እንዲገታ የጸጥታ ኃይሉ ጸጥታ በትኩረት እየሰራ ይገኛል፡፡

በተለያዩ አካባቢዎች የተከሰቱት ግጭቶች የሰላም፣ የልማት እና የዴሞክራሲያዊ ስርዓት ግንባታ ትግላችንን የሚጎዱ፤ በጊዜ ካልተፈቱም ሐገራችንን መቋጫ የሌለው ትርምስ ውስጥ የሚከቱ፤ በመራራ ትግል የተገኘውን ብሩህ ተስፋ የሚያጨናግፉ፤ እንዲሁም ለዘመናት የቆየ የአብሮ መኖር እሴቶቻችን የሚንዱ ችግሮች በመሆናቸው መንግስት ችግሮቹን በማያዳግም ሁኔታ ለመፍታት በቁርጠኝነት እንቅስቃሴ እያደረገ ሲሆን፤ ለ17 ቀናት በዝግ ጉባዔ ሲመክር የቆየው የኢህአዴግ ስራ አስፈጻሚ ኮሚቴም ችግሮችን የሚያስወግዱ እና የኢትዮጵያን ህዝብ ለላቀ ስኬት የሚያበቁ ውሳኔዎችን በማሳለፍ ተጠናቋል፡፡

በአጠቃላይ መንግስት እና ገዢው ፓርቲ ባለፉት ዓመታት ህዝቡን ለምሬት የዳረጉ የአመራር ችግሮችን ለማስተካከል ጥልቅ ተሐድሶ ሲያደርጉ ቆይተዋል፡፡ በቅርቡም በድርጅት እና በመንግስት መዋቅሮች ያሉትን ችግሮች ከሥር መሰረታቸው ነቅሎ ለመጣል እና ራሱን ለማስተካከል የሚያስችል ሥራ ለመስራት በኢህአዴግ ሥራ አስፈጻሚ ደረጃ ጠንከራ ግምገማ አድርጓል፡፡ ግምገማዎቹ ላይ ተመስርቶ የማያዳግም እርምጃ ወደ መውሰድ ይሸጋገራል ብለን ተስፋ እናደርጋለን፡፡

ቻይናዎች ‹‹ለየብቻ በፍጥነት መጓዝ ይቻል ይሆናል፡፡ ሆኖም ረጅም ርቀት መጓዝ የሚቻለው በጋራ በሚደረግ ጉዞ ነው›› ይላሉ፡፡ አሁን ባለው ዓለም አቀፋዊ ሁኔታ፤ በፍጥነት መሄድም ሆነ ረጅም ርቀት መጓዝ የሚቻለው በጋራ መሮጥ ሲቻል ብቻ መሆኑን ተገንዝበን፤ ሁላችንም ለህዝቦች አንድነት ትኩረት በመስጠት በህዳሴው ጎዳና ፈጣን እና ረጅም ጉዞ ለማድረግ እንነሳ፡፡     

የመገንጠል መብት ክፋቱ አይታየኝም

የመገንጠል መብት ክፋቱ አይታየኝም

አባ መላኩ

አንዳንዶች የኢፌዴሪ ሕገ-መንግሥት አንቀጽ 39 ንዑስ አንቀጽ 3 በመጥቀስ ህገመንግስቱ የአገሪቱን አንድነት ለአደጋ ያጋልጣል ሲሉ ይደመጣሉ። እውነቱን እንነጋገር ከተባለ ይህ አንቀጽ በህገመንግስት ሰፈረም አልሰፈረም መገንጠል የሚፈልግ አካል ካለ የሚያግደው አንዳችም ነገር አይኖርም። ለአብነት የካታሎናዊያን ከስፔን፣ ኪዩቤክ ከካናዳ እንዲሁም ስኮታላንዶችን ከእንግሊዝ ለመነጠል ጥያቄ ከማቅረብ አላገዳቸውም። እነዚህ አገራት የመገንጠል መብትን በህገመንግስታቸው ይፋ አላደረጉትም።  እንደእኔ እንደኔ ይህ አንቀጽ በህገመንግስታችን ተጠቀሰም አልተጠቀሰም  ተገፋሁ፣ ተጨቆንኩ የሚል ብሄር ወይም ብሄረሰብ ካለ ለመገንጠል  ጥያቄ  ማቅረቡ  አይቀርም። ይህ 21ኛው ክፍለ ዘመን ነው። ዜጎች መብታቸውን ጠንቅቀው የሚያውቁበት የመረጃ ዘመን ነው።   የኢፌዴሪ  ሕገ-መንግስት  ከመግቢያው ጀምሮ ከመገንጠል ይልቅ አንድነትንና አብሮነትን የሚያጸኑ  በርካታ አንቀጦችንና ሃሳቦችን  ያካተተ ሰነድ ነው።  ለአብነት  ሕገ-መንግሥታችን መግቢያ ላይ በሕዝቦች መካከል አንድ የጋራ ፖለቲካዊና ኢኮኖሚያዊ ማኅበረሰብ  መፍጠር የሚል  ትልቅ ሃሳብ ሰፍሮ እናገኛለን። ይህ ሃረግ እጅግ ሰፊና ጥልቅ ሃሳቦችን የያዘ ነው።  

 

ሕገ-መንግስታችን  ባለፉት 27 ዓመታት  በየዘርፉ በአገራችን ለተመዘገቡ ስኬቶቻችን  መሰረት መሆኑን ማንም ሊክደው አይችልም።  የፌዴራል ስርዓታችን  በራሱ የህገ-መንግስታችን አንዱ ውጤት ነው። በህዝቦች መካከል መከባበርና መቻቻል እንዲሰፍን ዋንኛ ምክንያት አገራችን  የተገበረችው የፌዴራል ስርዓት  ነው። ይህ ስርዓት ብሄሮች፣ ብሄረሰቦችና ህዝቦች ራሳቸውን በራሳቸው እንዲያስተዳድሩ፤ ባህላቸውን እንዲያጎለብቱ፣ በማንነታቸው እንዲኮሩ፣ ኃይማኖታቸውን በነጻነት እንዲተገብሩ፣  በቋንቋቸው እንዲዳኙ፣   ህጻናት በአፍ መፍቻ ቋንቋቸው እንዲማሩ፣ ወዘተ መልካም ሁኔታዎችን ፈጥሯል።   እነዚህን መብቶች በተግባር ያጣጣማቸው ህዝብ አጣቸዋለሁ ብሎ እንዳይሰጋ “የመገንጠል” መብት እንዳለው  ቢያረጋግጥ  ክፋቱ አይታየኝም።   እውነት እውነቱን  እንነጋገር ከተባለ ማንም የኢትዮጵያ ብሄር፣ ብሄረሰብና ህዝብ ዳግም ወደ ቀድሞው የአፈናና የጭቆና ስርዓት ለመመለስ አይፈልግም።

 

የአገራችን የፌዴራል ስርዓት የዜጎችን ሰብዓዊና ዴሞክራሲያዊ መብቶች ከማስጠበቁ ባሻገር ኢኮኖሚያዊ ተጠቃሚነትንም አረጋግጧል።  የፌዴራል ስርዓታችን ህዝቦች አካባቢያቸውን እንዲያለሙ መልካም ሁኔታን በማመቻቸት ፍተሃዊ የሃብት ክፍፍል እንዲኖርም አግዟል። ዛሬ ላይ በሁሉም የክልል ከተሞቻችን አገር አቀፍ ብቻ ሳይሆን ዓለም አቀፍ ትላልቅ ኢቨቶችን ማስተናገድ የሚያስችል  አቅም መፍጠር ችለዋል።  ከዚህ ቀደም እዚህ ግባ የሚባል መሰረተ ልማት  ያልነበራቸው አርብቶ አደር አካባቢዎች ዛሬ ላይ የትላልቅ መሰረተ ልማት ተጠቃሚ መሆን ችለዋል። በአስር ሺዎች የሚቆጠር እንግዶች የሚታደሙባቸው እንደብሄሮች፣ ብሄረሰቦችና ህዝቦች  በዓላት  ያሉ ኩነቶች  በታዳጋ ክልሎቻችን  በተሳካ ሁኔታ በመከበር ላይ ናቸው።   አራት  የብሄሮች፣ ብሄረሰቦችና  ህዝቦች  በዓላት  በጅግጅጋ፣ አሶሳ፣ ጋምቤላ፣ ዘንድሮ ደግሞ  በሰመራ በስኬት  ተከብሯል።   እነዚህ  በዓላት  የተከበሩት   በቀድሞ ስርዓት  እዚህ ግባ  የሚባል  መሰረተ ልማት ባልነበራቸው  አካባቢዎች  መሆኑ የሚያመላክተው  ነገር አለ።  ባለፉት 26 ዓመታት  በአገራችን እየተመዘገበ ያለው የኢኮኖሚ ዕድገት በመዕከል ወይም በተወሰነ አካባቢ የታጠረ  አለመሆኑን   ይህ  ጥሩ ማሳያ ነው።

 

እንደእኔ እንደእኔ በአገራችን  የኃይማኖት  እክራሪነት  ተቀባይነት እንዳይኖረው ያደረገው አንዱና ቀዳሚው ነገር  ህገመንግስታችን  ለኃይማኖት የሰጠው ነጻነት ይመስለኛል።  ዛሬ በአገራችን መንግስታዊ ሃይማኖትም ሆነ ሃይማኖታዊ መንግስት የለም። በሃይማኖት ምክንያት የሚደርሱ ተፅዕኖዎች ተወግደው ሁሉም ሃይማኖቶች በእኩልነት የሚስተናገዱበት ስርዓት ተረጋግጧል። በመሆኑም ሃይማኖቶች ሁሉ ተከባብረውና ተቻችለው የሚኖሩባት አገር መመስረት ተችሏል። ሁሉም ሃይማኖቶች አስተምህሮታቸውን በነጻነት የሌሎችን መብቶች አክብረው ማስተማር ኃይማኖታቸውንም በሰላማዊ መንገድ ማስፋፋት  ይችላሉ።  ይሁንና አንዳንድ ሃይሎች ይህን የሃይማኖት ነጻነት የሚለውን መርህ በተሳሳተ መንገድ ተረድተውት ባለፉት 26 ዓመታት አንዳንድ ሃይሎች  የግል ፍላጎታቸውን በኃይማኖት  ከለላ  ለማሳካት   ቢሯሯጡም  በህብረተሰቡ ተቀባይነት ማግኘት አልቻሉም።

በአገራችን አስተማማኝና ዘላቂ ሰላም  ማስፈን በመቻሉ  መንግስት ሙሉ ትኩረቱን ወደልማትና ዕድገት እንዲያደርግ አግዞታል። በተለይ  ባለፉት 15 ዓመታት አገራችን ዓለምን ያስደመመ  ባለሁለት አሃዝ  ፈጣን  ዕድገት  ማስመዝገብ ችላለች። ይህ ስኬት የሕገ-መንግስታችን  ቀጥተኛ  ውጤት ነው።  መንግስት ትላልቅና አሳታፊ የሆኑ ዕቅዶችን በመንደፍና ለተግባራዊነታቸው ጥረት በማድረጉ  በየዘርፉ  ተጨባጭ ለውጦችን  ተመዝግበዋል፤ አሁን ላይ የአገራችን  የድህነት መጠን ከግማሽ በላይ በመቀነስ ወደ  ከ22 በመቶ አካባቢ እንዲወርድ ሆኗል። በመጀመሪያው የዕድገትና ትራንስፎርሜሽን ዕቅድ   ከአፍሪካ ቀዳሚ የሆነ የውኃ ኃይል ማመንጫ ግንባታ፣ አገር አቋራጭ የባቡር መስመር ዝርጋታ፣ የከተማ ቀላል የባቡር መስመር ዝርጋታ፣  ዘጠኝ ግዙፍ የስኳር ፋብሪዎች (ከነእጥረታቸው)፣  የማዳበሪያ ፋብሪካዎች ግንባታዎች እንዲሁም ሰፋፊ አገር አቋራጭ የመንገድ ግንባታ፣ የቴሌኮሙዩኒኬሽን አውታር ዝርጋታ ወዘተ በመካሄድ ላይ ናቸው።  መንግስት በርካታ  ቢሊዮን ዶላር ወጪዎችን በመሰረተ ልማት ማስፋፋት  ላይ በማዋሉ  ኢትዮጵያ በዓለም ዓቀፍ ደረጃ  ኢንቨስትመንት በመሳብ ከቀዳሚዎቹ ተርታ  መሰለፍ ችላለች። በመሰረተ ልማት ማስፋፋት ላይ የሚውል ገንዘብ ነገ የሃብት ምንጭ እንደሚሆን በዕርግጠኝነት መናገር ይቻላል።

የኢትዮጵያ መንግስት  የእያንዳንዷ ሰላማዊ ደቂቃ  ለአገራችን ተጨማሪ የልማት ዕድል የምትፈጥር እንደሆነች  ይገልጻታል። ይሁንና  ከቅርብ ጊዜ ወዲህ   በአንዳንድ  አካባቢዎች በተቀሰቀሱት ሁከቶች  የአገራችንን ልማትና ዕድገት እየጎዱት እንደሆኑ  መመልካት የሚከብድ አይደለም። የአገራችን ህዝቦች የልማት ፍላጎት ሰፊና ትልቅ ከመሆኑ ባሻገር ፈጣንም ነው። እንኳን ካለን ላይ አፍርሰንለት(አውድመንለት)፤  እንኳን ለልማት የሚለውን ጊዜና ገንዘብ  ለነውጥና ሁከት አውለነው ይቅርና በጀመርነው  ፍጥነት እየሮጥን እንኳን የህብረተሰቡን የመልማት ፍላጎት ማሳካት አልተቻለም። የአገራችንን ዕድገትና ልማት  የተሻለ የምናደርገው በሰላማችን ላይ መደራደር ስናቆም ብቻ ነው። ይህን ስል መንግስትን መቃወም ተገቢ አይደለም ማለቴ እንዳልሆነ ሊሰመርልኝ እፈልጋለሁ። ይሁንና ተቃውሞዎች ሁሉ ሰላማዊ በሆነ መልኩ መካሄድ እንዳለባቸው ግን  አስረግጬ መናገር እፈልጋለሁ። ህይወት በማጥፋትና ንብረት በማውደም የሚደረግ ተቋውሞ  ጤነኛ  አካሄድ  አይደለም። እንዲህ ያሉ ቅጥ ያጡ  አካሄዶች  አገራችንን ወዳልተፈለገ  መንገድ  እንደሚያመሯት  ከሶሪያ፣ ሊቢያና የመን  መማር ይመበጀን ይመስለኛል።

የኢፌዴሪ  ህገመንግስት  ጭቆና ዳግም እንዳይመለስ፣ ዋስትና ያለው ዴሞክራሲያዊ ስርዓት ቀጣይነት እንዲኖረው የሚያደርግ ለብሄሮች ብሄረሰቦችና ህዝቦች  መብቶች  መረጋገጥ  ዋስትና  የሚሆን  አንቀጽን አካቷል። ይህን ህጋዊ መስመርን  የሚከተል ማንኛውም መገንጠል የሚፈልግ አካል በህገመንግስቱ በሚፈቅደው መሰረት በአግባብ የሚስተናገድበት ሁኔታ ተቀምጧል። የዚህ አንቀጽ በህገመንግስቱ  መካተት የሚያመላክተው   ህገመንግስቱ ለሰላም ያለውን ቁርጠኝነት ነው። ምክንያቱም ማንም ህጋዊውን መስመር ተከትሎ መገንጠል የሚሻ አካል  ካለ  ግጭት ውስጥ  መግባት ሳያስፈልገው  ሰላማዊ በሆነ ሁኔታ  የፈለገውን  ማሳካት እንደሚችል ነው።   

በኢፌዴሪ ህገመንግስት ዜጎች በአገራቸው ውስጥ  በየትኛውም  አካባቢ በነፃነት የመዘወዋወር፣  በፈለጉበት አካባቢ የመኖር፣ ሃብት የማፍራት ህገመንግስታዊ መብትና ዋስትና  እንዳላቸው  እንዲሁም  በፈለጉ ጊዜ ከአገር ወጥተው  በፈለጉ  ጊዜ ወደ አገር  ውስጥ የመመለስ መብታቸው የተረጋገጠ  ነው።  ይሁንና  ከቅርበ ጊዜ ወዲህ  እነዚህ መብቶች  በአግባብ  እየተተገበሩ አይደለም።  በአንዳንድ አካባቢዎች  በተከሰቱ  ሁከቶች  የበርካታ ንጹሃን ዜጎች ህይወት በከንቱ ጠፍቷል፣ አካላቸው ጎድሏል፣ በመቶ ሺዎች ተፈናቅለዋል፣ ንብረቶቻቸው ተቃጠለዋል አሊያም ተዘርፈዋል።  ለዚህ ቀውስ  በዋናነት ከፍተኛ አመራሩ  በተለይ የኢህአዴግ  ስራ አስፈፃሚና  የመንግስት  ከፍተኛ  የስራ ሃላፊዎች ሃላፊነት ይሁን እንጂ  በየደረጃው ያሉ  የድርጅትና የመንግስት  የስራ ሃላፊዎች እንዲሁም ህብረተሰቡም  የነበራቸው ሚና ቀላል የሚባል  አይደለም። የነውጥና ሁከት ጎዳናዎች ሰፊ ሂደታቸውም አጭርና  ቀላል ይሁን እንጂ ውጤታቸው  እጅግ አስከፊና ዘግናኝ ነው። ነውጥና ሁከት  በደቂቃዎች ውስጥ  የበርካታ ንጹሃን ህይወትን ቀምቶናል፣ የበርካታዎችን አካል አጉድሏል፣ በመቶ ሺዎች የሚቆጠሩትንም ከቀያቸው እንዲፈናቀሉ አድርጓል።  ለዓመታት የገነባናቸውን  መሃበራዊ መገልገያዎች  እንዲሁም    የግለሰቦች በህይወት ዘመናቸው  ሁሉ ያፈሯቸውን ንብረቶች  በደቂቃዎች ውስጥ አጥተዋል።  መንግስት  የህግ  የበላይነትን ማረጋገጥ፣ የዜጎችን ሰብዓዊና ዴሞክራሲያዊ መብቶች ማስጠበቅ  ግዴታው ነው።   የህግ የበላይነትን ማረጋገጥ የማይችል መንግስት መንግስት ሊሆን አይችልም። ህብረተሰቡም  ለአገራችን ዘላቂ ሰላም መረጋገጥ  ከመንግስት ጎን መቆም ተቀዳሚው ተግባሩ ሊሆን ይገባል።   

 

 

 

 

የበቀል መዳረሻው የት ይሆን?

የበቀል መዳረሻው የት ይሆን? 

ወንድይራድ ኃብተየስ

 

ኢትዮጵያ ፌዴራላዊ ሥርዓት መከተል ከጀመረት  27 ዓመታትን አስቆጠረች።  በእነዚህ ዓመታት ኢትዮጵያ የቀንዱ አካባቢ ሠላም ደሴት መሆኗን በተግባር አሳይታለች። አገራችን የተረጋጋች ሠላም የሰፈነባት ለመሆን የበቃችው የህዝቧቿ መሠረታዊ ጥያቄዎችን ማስተናገድ የሚያስችል ሥርዓት መከተል በመቻሏ ብቻ ነው። በርካታ ልዩነቶችና ፍላጎቶች ለአብነት የብሄር፣ የኃይማኖት፣ የማንነት፣ የአስተሳብ የሚስተዋሉባት እንዲሁም በዓለም በነውጥ ቀጠናነቱ በሚታወቀው ባልተረጋጋው እና ተለዋዋጭ የፖለቲካ ሁኔታ በሚታይበት የምሥራቅ አፍሪካ  ቀጠና የምትገኘው ኢትዮጵያ ስኬታማ  ለመሆን የበቃችው በፌዴራላዊ የአስተዳደር ሥርዓቷ ነው። ባለፉት ሥርዓቶች የነበሩት አሃዳዊ ሥርዓቶች አገሪቱን ለምን ዳርገዋት እንደነበር የቅርብ ጊዜ ትውስታ ነው።   

 

እንደእኔ እንደኔ በ21ኛው ዘመን አዲሲቷን ኢትዮጵያ ከፌዴራል ሥርዓት ውጪ ማሰብ ራስን በራስ እንደማጥፋት የሚቆጠር ተግባር ይመስለኛል።  አንዳንድ ቡድኖችና ግለሰቦች በማወቅም ይሁን ባለማወቅ ይህን የፌዴራል ሥርዓት ችግር እንዲገጥመው የሚደረጉ ሩጫዎች ለማንም የሚበጁ አይመስለኝም።  በኢትዮጵያ የህዝቦች  የሠላም፣ ልማትና  የዴሞክራሲ ጥያቄዎች  ምላሽ   ማግኘት  የጀመሩት  በዚህ የፌዴራል ሥርዓት ነው። ችግሮች መኖራቸው የሚካድ አይደለም፤ በእርግጠኝነት መናገር የሚቻለው ግን ተነጋግረን ልናስተካክላቸው የምንችላቸው ናቸው። በነውጥ  የሚመጣ  ለውጥ  መዳረሻው አይታወቅም። በቀል የሠላምን መንገድ  እየዘጋ ነውጥና ሁከትን እያባባሰ ወደ ውድቀት ይመራል እንጂ መልካም ነገርን አያመጣም።

 

የፌዴራል ሥርዓታችን  ዘላቂ ሠላም አስፍኖልናል፤  ልንለማ፣ ልናድግና ልንለወጥ እንደምንችል በተጨባጭ አሳይቶናል። ብዝሃነትን በአግባብና ዴሞክራሲያዊ በሆነ መንገድ መያዝ ከተቻለ የጥንካሬና የአንድነት ምንጭ እንደሚሆነም አዲሲቷ ኢትዮጵያ ጥሩ ምሣሌ ናት።  የተለያዩ ልዩነቶችንና ፍላጎቶችን  ተቀብሎ  ዴሞክራሲያዊ  በሆነ  ሁኔታ ማስተናገድ የሚችል ሥርዓት መገንባት ከተቻለ ህብረ ብሄራዊነት የልዩነት ምንጭ መሆኑ ቀርቶ የሥርዓቱ ዋልታና ማገር በመሆን በልዩነት ወስጥ ያለውን አንድነትን የሚያጠናክር የአንድነት ማሰሪያ ገመድ ነው። የብሄሮች፣ ብሄረሰቦችና ህዝቦች መብት ከተረጋገጠ አብሮነትን የሚጠላ አካል አይኖርም። እስካሁን ያለው አብሮነትም የስኬታችን ዋነኛ መነሻም መድረሻም ነው።  

 

መንግሥት ልዩነታችንን ሊያሰፉ ህዝብን ሊያራርቁ የሚሯሯጡ ኃይላትን ከህዝቡ ጋር በመተባበር ህግ ፊት ሊገትራቸው ይገባል። የህግ የበላይነት መቼም ለድርድር መቅረብ የለበትም።  ክቡር ጠቅላይ ሚኒስትር ኃይለማርያም ደሣለኝ በቅርቡ እንደተናገሩት ግጭት የቀሰቀስ ወይም ግጭት እንዲባበስ ያደረጉ ማንኛውም አካላት ከህግ ተጠያቂነት አያመልጡም። ይህን ጉዳይ  በተግባር ማየት እንፈልጋለን። ሁሉም አገር ወዳድ ዜጋ  ኪራይ ሰብሳቢዎች፣ ጠባቦችና ትምክህተኞች  የህልውናችን  መሠረት የሆነውን የፌዴራል ሥርዓታችንን ለመበተን የሚያደርጉትን መሯሯጥ ከመንግሥት ጎን ተሰልፈን ልንዋጋቸው ይገባል። ይህ ነገር ከመፈክር አልፎ በተግባር ልንፈጽመውም ይገባል። ለህዝብ ጥቅም ቆሜያለሁ የሚል ዜጋ ሁሉ የነውጠኞችንና የሴረኞችን መሰሪ አካሄድ ሊያወግዝ ይገባል።  የጥፋት ኃይሎችን ለህግ በማቅረብ በአዲሲቷ ኢትዮጵያ የህግ የበላይነት ለድርድር እንደማይቀርብ ማረጋገጫ መሆን መቻል አለበት። ይህ ሲሆን ሌላውም ትምህርት ያገኛል፤ በቀጣይም ሌሎች  የጥፋት እጆችም ይሰበስባሉ።  

 

ጥቅመኞች ለህዝብና  አገር  ተቆርቋሪ  በመምሰል  አንዱን ብሄር ተጠቃህ፣ ተናቅህ፣ ወገኖችህ አለቁ ድርስላቸው ወዘተ በማለት በግጭቶች ላይ ቤንዚን ሲያርከፈክፉ ተመልክተናል፤ የሚሰጧቸውን መግለጫዎችም አድምጠናል። በእውኑ እነዚህ ኃይሎች ለኅብረተሰቡ ተቆርቁረው ነውን? ይህን መመርመር ይገባል። አንዳንድ ሚዲያዎችም በዚህ ረገድ አካሄዳቸውን ቢያጤኑት መልካም ይመስለኛል።  የወቅቱን ነበራዊ ሁኔታዎች በቅጡ ካለመረዳት ይመስለኛል የሚያስተላልፏቸው መረጃዎች ስሜት ቆስቋሾች ሆነው ይታያሉ። የበቀል መንገድ  የትም አያደርስም። በበቀል አሸናፊም ተሸናፊም የለም። ለየትኛውም አካል ቢሆን የበቀልና የእልህ መንገድ መዳረሻው እልቂትና  ወድቀት ነው።

 

የፌዴራል ሥርዓታችን ያስተማረን ትልቅ ነገር መቻቻል፣ መከባበርና አብሮ መኖርን ነው። ይሁንና ከቅርብ ጊዜ ወዲህ ይህን እሴታችንን የሚሸረሽሩ ድርጊቶች በየአካባቢው እያስተዋልን ነው። ህዝቦችን በማጋጨት የሚገኝ የፖለቲካ ትርፍ ለማንም አይበጅ። እወክለዋለሁ ለሚባለው ብሄርም  ቢሆን  በመደጋገፍና በመተሳሰብ  አብሮ በመኖር እንጂ  በመነቋቆር የሚያገኘው አንዳችም ትርፍ የለም። ባለፉት 27 ዓመታት ተቻችለንና ተከባብረን አብረን በመኖራችን በርካታ ነገሮችን አትርፈናል፤ ሰፊና አማላይ ገበያ፣ ጠንካራና አዳጊ ኢኮኖሚ፣ ተጽዕኖ ፈጣሪ መንግሥት፣ በሥነ ምግባር የታነፀ ህዝባዊ  የፀጥታ ኃይል ወዘተ።

 

በአንዳንድ የአገራችን አካባቢዎች በህዝቦች መካከል የተከሰቱ ግጭቶች ተጨማሪ ጥናት የሚያስፈልጋቸው ቢሆንም በፌዴራል ሥርዓታችን ጉድለት ሣቢያ የተከሰቱ ችግሮች እንዳልሆኑ ግን  በእርግጠኝነት መናገር ይቻላል። ኢትዮጵያ ለዘመናት የዘለቀ ውስብስብ ችግሯን መፍታት የቻለችው በዚህ የፌዴራል ሥርዓት ነው። አንዳንዶች እዚህና እዚያ የሚነሱ ትናንሽ ግጭቶችን እንደማሣያ በማቅረብ  ፌዴራል ሥርዓቱ  ድክመት አድርገው ለማቅረብ ጥረት ቢያደርጉም በተጨባጭ ያየነው ግን አገሪቱ በስኬት ጎዳና መጓዟን ነው።  ኢትዮጵያ የበርካታ ብሄሮች፣ ብሄረሰቦች ህዝቦች፣ የበርካታ ኃይማኖቶች፣ በርካታ አስተሳሰቦች፣ በርካታ ባህሎች ወዘተ  ያሉባት አገር በመሆኗ እነዚህን ልዩነቶች ሊያስተናግድ የሚችል የአስተዳደር ሥርዓት መከተል የግድ ይላታል፤ ይህ ሥርዓት ደግሞ ከነእጥረቱም ቢሆን  የፌዴራል ሥርዓት ብቻ ነው። እውነትም ይህ ሥርዓት የኢትዮጵያን ችግሮች አክሞ ባለፉት 27 ዓመታት አገሪቱን በስኬት ጎዳን እንድትረማመድ  አድርጓታል።

 

የፌዴራል ሥርዓታችን  የህዝቦችን ሰብዓዊና ዴሞክራሲያዊ  መብቶች ከማረጋገጥ ባሻገር አገሪቱን በፈጣን  የምጣኔ ሀብት ለውጥ ምህዋር ውስጥ አስገብቷታል። ኢትዮጵያ በዓለም አቀፍ መድረክ የነበራት ገጽታም ሆነ ተሰሚነት ባለፉት 27 ዓመታት እጅጉን  ተለውጧል፤ አስተማማኝና ዘላቂ ሠላም በመስፈኑ  በዓለም አቀፍ ደረጃ  የኢንቨስትመንት መዳረሻ እየሆነች ነው። ከባድ ድርቅ ለተከታታይ ዓመታት ቢከሰትም በራስ አቅም መቋቋም ተችሏል።  ኢትዮጵያ ዛሬ ላይ  በአፍሪካ ሆነ  በዓለም ዓቀፍ መድረክ ተሰሚነቷ በማደጉ በአገሮች መካከል ግጭት ወይም ያለመግባባት ሲከሰት የኢትዮጵያ ከፍተኛ ባለሥልጣናት በአደራዳሪነት ወይም ሸምጋይነት ግንባር ቀደም ተመራጭ እየሆኑ መጥተዋል። ከቅርብ ጊዜ ወዲህ አገሪቱን በተባበሩት መንግሥታት ያላት ተሰሚነት፣ በአፍሪካ ህብረት ያላት የመሪነት ሚና እንዲሁም በኢጋድና በሌሎች ትላልቅ መድረኮች ያላት ቦታ ከሰማይ የወረደ መና ሳይሆን መንግሥት ባከናወነው  ተግባር ነው።   ይህ የፌዴራል ሥርዓቱ ስኬት አይደለምን? እነዚህን ትላልቅ  የፌዴራል ሥርዓታችን  ስኬቶች ወደ ጎን ተብለው  ለምን  ትናንሽ ነገሮችን ብቻ ለማጎን እንሽቀዳደማለን?

 

ኢትዮጵያ የምሥራቅ አፍሪካ አገሮችን ሠላም ዘላቂ እንዲሆን ከምታደርገው የሠላም ማስከበር ሥራ ባሻገር አገራት በምጣኔ ሀብት ጥቅም እንዲተሳሰሩ በርካታ ተግባራትን  በማከናወን ላይ ትገኛለች። ለአብነት ታላቁ የኢትዮጵያ የህዳሴ ግድብ አንዱ ነው።   በታዳጊ  አገር  አቅም ለመገንባት አይታሰብም የሚባለውን ይህን ፕሮጀክት አሁን ላይ  ከ60 በመቶ በላይ ደርሷል። ይህስ የፌዴራል ሥርዓቱ እውን ከሆነ በኋላ የመጣ ስኬት አይደለምን? እንዲሁም ኢትዮጵያ ለሁሉም ጎረቤት አገራት ዜጎች እንደሁለተኛ አገር በመቆጠር ከሰሐራ በታች ካሉ የአፍሪካ አገራት ከፍተኛ ቁጥር ያለውን ስደተኞችን ማስጠለል ብቻ ሰይሆን  ለስደተኞች ምቹ ሁኔታዎችን በመፍጠር በተባባሩት መንግሥታት ድርጅት ጭምር ሙገሳ ተችሯታል። በአሁኑ ወቅት ኢትዮጵያ ከሶማሊያ፣ ከደቡብ ሱዳንና ከኤርትራ የተሰደዱ ከ850 ሺህ በላይ ለሚሆኑ ስደተኞች መጠለያ ሆናለች።  

አገሪቱ ከላይ ያነሳኋቸውን ስኬቶች  ማስመዝገብ የቻለችው ሕዝቦቿ በመከባበርና በመቻቻል አብሮ በመኖራቸው ነው። አብሮ መኖር ያስቻለን ደግሞ ልዩነቶቻችንን ማስተናገድ የስቻለን  የፌዴራል ሥርዓታችን ነው። በመሆኑም አንዳንድ ኃይሎች  በአገሪቱ  የሚስተዋሉ  የመልካም አስተዳደር ችግሮች  ሁሉ  የፌዴራል ሥርዓቱ እንከኖች አድርገው ለማቅረብ ጥረት ሲያደርጉ ይስተዋላሉ።  አንዳንዶች ደግሞ ለህዝብና  አገር  ተቆርቋሪ  በመምሰል ትናንሽ ግጭቶችን በማጎን  እከሌ የተባለው ብሄር ሊያጠቃህ ነው፤ ተነስ፣ ለወገኖችህ  ድረስላቸው ወዘተ በማለት  በግጭቶች  ላይ ቤንዚን ሲያርከፈክፉ ተመልክተናል፤ የሚሰጧቸውን መግለጫዎችም አድምጠናል። የሌለን ነገር እየፈጠሩ ብሄሮችን ማጋጨት ለማንም የማይበጅ የፖለቲካ አካሄድ ነው።  የበቀል መንገድ  የትም አያደርስም። በበቀል አሸናፊም ተሸናፊም የለም። ለየትኛውም አካል ቢሆን የበቀልና የእልህ መንገድ መዳረሻው እልቂትና  ወድቀት ነውና።

 

 

የሚዲያ ግብ ሠላምና ልማት ነው

የሚዲያ ግብ ሠላምና ልማት ነው

ኢብሳ ነመራ

ሰሞኑን በኦሮሚያና በኢትዮጵያ ሶማሌ አዋሳኝ አካባቢዎች በተቀሰቀሰ ግጭት የሰዎች ህይወት ጠፍቷል። በዚህ ጉዳይ ላይ የፌዴራል መንግስት፣ እንዲሁም የኦሮሚያና የኢትዮጵያ ሶማሌ ክልላዊ መንግስታት የተሰማቸውን ሃዘን ገልጸው፣ በዚህ አሰቃቂ የወንጀል ድርጊት የተሳተፉ ግለሰቦችን ለህግ እንደሚያቀርቡ አሳውቀዋል። በኦሮሚያና በኢትዮጵያ ሶማሌ ክልሎች አዋሳኝ አካባቢዎች ግጭት ከተቀሰቀሰ አንድ ዓመት ያህል ጊዜ አስቆጥሯል። በዚህ ግጭት ከሁለቱም ወገን ሰዎች ተጎድተዋል። የሁለቱም ወገን ተጎጂዎች ኢትዮጵያውያን ናቸው። በሁለቱም ወገን የተጎዱት፣ ለዘመናት በድህነት ውስጥ የኖሩ፣ ባለፉ አንድ ተኩል አስርት ዓመታት ድህነትን ለማስወገድ በተደረገ ትግል መሰረታዊ ፍላጎታቸውን በማሟላት ድህነትን መቅረፍ የጀመሩ፣ ድህነትን ማሸነፍ እንደሚቻል አምነው የተሻለ ህይወት ተስፋ ያደረባቸው ኢትዮጵያውያን ናቸው። ይህ ሁኔታ ግጭቱ ሁሉንም ኢትዮጵያዊ የሚቆረቁር እንዲሆን ያደርገዋል።

ከዚህ ግጭት የሚያተርፍ ያለም። በዚህ የእርስ በርስ ግጭት አሸናፊ የለም። ግጭቱ በበረታና ጉዳቱ በከፋ መጠን የኦሮሞና የኢትዮጵያ ሶማሌ ህዝብ፣ እንዲሁም አጠቃላይ የኢትዮጵያ ህዝብ እየተሸነፈ እንደሄደ ነው የሚቆጠረው። እናም ይህን ሁሉም ኢትዮጵያዊ ተሸናፊ የሚሆንበትን ግጭት ማስቆም ለነገ የሚባል ጉዳይ አይደለም።

ታዲያ በመግቢያው ላይ የጠቀስኩትን የሰሞኑን ግጭት ተከትሎ በተለይ በአንዳንድ ማህበራዊ ሚዲያዎች የተላለፉ ዘገባዎች ይህን ሁሉም ኢትዮጵያዊ የሚሸነፍበትን ግጭት የማቀጣጣል ዝንባሌ ባላቸው አካላት የተላለፉ ሆነው አግኝቻቸዋለሁ። በተለይ ከወደ አሜሪካ ጂግጂጋ ሄራልድ በተሰኘ ድረገጽ ላይ የተለጠፈ አንድ ዜና የኢትዮጵያውያን ጠላት ዘገባ ሆኖ አግኝቼዋለሁ። The Orchestrated Massacres of Somalis in Oromia is Tantamount to an Ethnic Cleansing በሚል ርዕስ የተሰራጨው ዜና አናት ላይ ፎቶ ግራፍ ተለጥፏል። ይህ ፎቶ ግራፍ የበርካታ ሰዎች አስከሬን የታጨቀበት ጉድጓድና ጉድጓዱ አጠገብ አስከሬን የጫነ መኪና ቆሞ የሚታይበት ነው። ይህ የዜናው ምስል ሰሞኑን በኢትዮጵያ ሱማሌና በኦሮሚያ አዋሳኝ አካባቢ ያጋጠመውን ግጭት አሰቃቂ ገጽታ የማሳየት ዓላማ ያለው ነው። ይህ ምስል ግን፣ ከዚህ ከሰሞኑ ግጭት የተወሰደ አልነበረም። ከሁለት ዓመታት በፊት በቡሩንዲ አጋጥሞ ከነበረ ግጭት የተወሰደ ነው። የግጭቱን ውጤት በተሳሳተ መረጃ በማጋነን፣ ተጠቃሁ የሚለውን ወገን ለበቀል በማነሳሳት ግጭቱን ለማባባስ ሆን ተብሎ የተለጠፈ ሃሰተኛ መረጃ መሆኑን ልብ በሉ።

ልብ በሉ፤ በግጭቱ ሰዎች አልሞቱም እያልኩ አይደለም። ይህን መንግስትም በይፋ ተናግሮታል። ይሁን እንጂ ሁሉም ኢትዮጵያዊ የሚሸነፍበትን ይህን ግጭት ሊያባብስ የሚችል ማንኛውንም ድርጊት መፈጸም ከህግም ከስነ ምግባርም አኳያ ጸያፍ መሆኑን ሊስተዋል  ይገባል። በተለይ መገናኛ ብዙሃን በዚህ አይነት የእርስ በርስ ግጭት ላይ እውነተኛ መረጃ እንኳን ቢኖራቸው፣ ይህን መረጃ መለቀቅ አስከፊና አደገኛ ውጤት የሚኖረው ከሆነ መልቀቅ አይኖርባቸውም። ይህን እንዲያደርጉ የሞያው ስነምግባር ያስገድዳቸዋል። የጋዜጠኝነት ወይም የመገናኛ ብዙሃን ስራ መደረሻ ሰላምን ማሰፈን፣ ልማትን ማቀላጠፍ፣ ሰላምና ልማትን የሚያደናቅፉ ድርጊቶችንና እቅዶችን ማጋለጥ ወዘተ ነው። የጋዜጠኝነት ወይም የመገናኛ ብዙሃን ስራ የስነምግባር ደንብም በዚህ ላይ የተመሰረተ ነው። እንግዲህ ቀደም ሲል የጠቀስኩት ሚዲያ ከዚህም አልፎ ውጤቱ አስከፊና አደገኛ የሆነ ሃሰተኛ መረጃ ነበር ያስተላለፈው። ይህ ጸያፍ ነው።

ይህ በመገናኛ ብዘሃን አካባቢ የሚታይ አዝማሚያ በአሁኑ ወቅት በሃገራችን ካለው ሁኔታ አኳያ ሲታይ ስለግጭት ምንነትና በግጭት ወቅት መገናኛ ብዙሃን ስለሚኖራቸው ድርሻ ማስታወስን አስፈላጊ ያደርገዋል።

የግጭት ምንነትና መገናኛ ብዙሃን በግጭት ወቅት ሊኖራቸውው የሚገባ ሚና ወይም የሰላም ጋዜጠኝነት ሰፊ ጽንሰ ሃሳብ ነው። የዚህ ጽሁፍ ትኩረት ይህን ሰፊ ጽንሰ ሃሳብ መተንተን አይደለም። ከዚህ ይልቅ ዜጎች፣  ጋዜጠኞች፣ በተለይ የማህበራዊ ሚዲያ ባስገኘው እድል የተሰማቸውን ሃሳብ በፌስ ቡክ ገጽና መሰል ሚዲያዎች የሚያስተላልፉ ግለሰቦች ቆም ብለው እንዲያስቡ ማባነን ነው።

ግጭት ለሚለው እሳቤ በርካታ የማህበራዊ ሳይንስ ተመራማሪዎች የተለያየ ትርጉም ሰጥተውታል። ለዚህ ጽሁፍ ዓላማ በተለያዩ አካላት ከተሰጡ የግጭት ትርጉሞች ከላልሼ ያገኘሁትን ትርጉም ለመጠቀም ወድጃለሁ። ይህም ግጭት በሁለትና ከዚያ በላይ በሆኑ ቡድኖች መካከል ወይም በአንድ ቡድን አባላት መሃከል አንዱ የሌላውን አመለካከት ባለመቀበልና በመከላከል ስሜት የሚፈጠር እስከ አካላዊ ጥቃት መሰንዘር ሊዘልቅ የሚችል በባለጋራነት የመተያየት፤ የመጠላላት ሁኔታ ነው ይላል።

ግጭት እየተቀያየረ የሚሄድ ሂደትና ኡደት ያለው ሁኔታ ነው። ግጭት ከመጸነስ እስከ መክሰም የተለያየ ደረጃዎች ባሉት ሂደት ውስጥ የሚያልፍ ሁኔታ ነው። የግጭት ጽንስ በሁለት ቡድኖች ወይም በአንድ ቡድን አባላት መሃከል የሚፈጠር በጥርጣሬ የመተያየት የውጥረት ሁኔታ ነው። በዚህ የውጥረት ደረጃ ወደግጭት የሚገቡ አካላት በጥርጣሬ መተያየት ይጀምራሉ። ይህ ውጥረት ረግቦ ሁኔታዎች ወደነበሩበት ሳይመለሱ ከቀሩና ውጥረቱ ከተባባሰ፣ ውጥረት ውስጥ ያሉ ሰዎች ጎራቸውን ወደማጥራት ይሸጋገራሉ። ሁለተኛው የግጭት ደረጃ የጎራ ማጥራት ነው። ከዚህ በኋላ ሁሉም ጎራዎች ደጋፊ ወይም አጋራቸውን በመጨመር ራሳቸውን ወገን ወደሚያጎለብቱበት የግጭት ጉልምስና ደረጃ ይሸጋገራሉ። በሁሉም ተጋጪዎች ጎራ የጎለመሰውን ግጭት እንዲሰንፍ በማድረግ ሁኔታዎችን ማርገብ ካልተቻለ አጋጣሚዎችን ጠብቆ ወደሃይል ጥቃት (violence) ደረጃ ይሸጋገራል። ይህ የግጭት የመጨረሻና አደገኛ ደረጃ ነው። ከዚህ በኋላ እንደሁኔታው ወደመርገብና መክሰም ሊመለስ ይችላል። ማናቸውንም ወደሃይል ጥቃት የተሸጋገገሩ ግጭቶች ሲመረመሩ እነዚህን ሂደቶች ያለፉ መሆናቸውን መረዳት ይቻላል።

በእነዚህ የግጭት እድገት ሂደት ውስጥ በማንኛውም ደረጃ ላይ ግጭቶችን የሚያበርዱ ርምጃዎችን መውሰድ ይቻላል። ግጭቶችን በማርገብ ሰላምን በማስፈን ረገድ የመገናኛ ብዙሃን ትልቅ ድርሻ አላቸው። ከግጭት መጸነስ እስከ የሃይል ጥቃት ያለውን ሂደት በማፋጠንና በማቀጣጣል ረገድም የዛኑ ያህል ከፍተኛ ድርሻ አላቸው። ብዙ የተነገረለትን እ ኤ አ በ1995 ዓ.ም በሩዋንዳ የተከሰተውን የዓለማችን ዘግናኝ ግጭት ለዚህ ማሳያነት መጥቀስ የቻላል። በመግቢያው ላይ እንዳነሳሁት ትክክለኛ (proper) መገናኛ ብዙሃን መድረሻቸው ሰላምና ልማትን ማረጋገጥ ነው። ስለሆነም የሞያውን ስነምግባር የሚያከብሩ ትክክለኛ መገናኛ ብዙሃን ግጭቶች ገሃድ መውጣት በጀመሩበት በማንኛውም ደረጃ ላይ ማምከን የሚያስችል ተግባር ማከናወን ይጠበቅባቸዋል።

ግጭትን ከመከላከል ጋር ተያይዞ ከላይ በጠቀስነው የግጭት ሂደት ውስጥ ሊስተዋል የሚገባ አንድ የግጭት ባህሪ አለ። ይህም ግጭቶች ከውጥረት ወደ የሃይል ጥቃት እያደጉ በሄዱበት ልክ፣ አስታራቂና ሸምጋይ ድምጾች እየተደፈቁ፣ በተቃራኒው ግጭት ውስጥ የገቡት ጽንፎች ድምጾች እየጎሉ የሚሄዱ መሆኑ ነው። ይህ ሁኔታ የግጭቶችን ወደአደገኛ ሁኔታ መሸጋጋር ይጠቁማል። በዚህ ሂደት መገናኛ ብዙሃን በግጭቱ ትኩሳት ተጠልፈው እንደ ሁኔታው የአንዱን ወይም የሁለቱንም ጽንፎች አቋሞች በማሰራጨት ግጭት ማቀጣጠል ውስጥ የሚገቡበት አጋጣሚ የተለመደ ነው። የውጥረትና የግጭት ዜናዎች ቀልብ ሳቢ በመሆናቸው አንባቢና ገበያ ፍለጋ  ግጭት አባባሽ ሁኔታ ውስጥ የሚገቡ መገናኛ ብዙሃነም አሉ። ከዚህ በተጨማሪ ከውጤት ይልቅ ተጨባጭነት (objectivity) ላይ በማተኮር ግጭት አባባሽ ዘገባዎችን የሚያቀርቡበት ሁኔታም የተለመደ ነው። እርግጥ ግጭቶችን ለማባበስ ሆን በለው የሚቋቋሙና የሚሰሩ የአንድ ወገን መገናኛ ብዙሃን አሉ። እነዚህ አደገኞች ናቸው።

በሃገራችን ያሉ የህዝብም ሆኑ የግል መገናኛ ብዙሃን እንዲሁም በኢትዮጵያ ጉዳይ ላይ አተኩረው የሚሰሩ መገናኛ ብዙሃን አውቀውም ይሁን ባለማወቅ ግጭት አባባሽ ሁኔታ ውስጥ መግባታቸውን የሚያመለክቱ እውነታዎች አሉ። እናም መገናኛ ብዙሃኑ ራሳቸውን  ፈትሸው እንዲቃኑ እንጠብቃለን፤ ሰላም ያስፈልገናልና።

ያም ሆነ ይህ፤ በግጭት ወቅት መገናኛ ብዙሃን የግጭቱን ባህሪና ያለበትን ደረጃ ተረደተው ግጭቶችን የሚያረግብና ሰላም የበላይነት እንዲኖረው ማድረግ የሚያስችሉ የሰላም ጋዜጠኝነት ስራ የመስራት የስነምግባር ሃላፊነት አለባቸው። በተለይ ግጭቶች እየተባባሱ ሲሄዱ የጽንፎች ድምጾች እየጎሉ፣ በተቃራኒው አስታራቂና ሸምጋይ ድምጾች እየተደፈቁ ስለሚሄዱ፣ እነዚህ የሚደፈቁ የሰላም ድምጾች ላይ አተኩረው መስራት ይጠበቅባቸዋል።

በአጠቃላይ አሁን በሃገራችን በተለያዩ አካበቢዎች ወደየሃይል ጥቃትነት የተሸጋገሩ ግጭቶችና ገና ወደ የሃይል ጥቃት ደረጃ ያላደጉ በውጥረት ደረጃ ላይ ያሉ ግጭቶች አሉ። የህዝብም ሆኑ የግሉ መገናኛ ብዙሃን እነዚህ ግጭቶች የሚበርዱበትና ሰላም የሚሰፍንበትን ሁኔታ ለመፍጠር አስበው መስራት አለባቸው። የመገናኛ ብዙሃን ግብ ሰላምና ልማትን ማረጋገጥ እንጂ ግጭትን ማባባስና ቀልብ ሳቢ የግጭ ዜና በመቸብቸብ መክበር አይደለምና።

 

 

አዲሲቷ ኢትዮጵያ ማንም እያነሣ የሚጥላት አይደለችም!

አዲሲቷ ኢትዮጵያ ማንም እያነሣ  የሚጥላት አይደለችም!

አባ መላኩ

አዲሲቷ ኢትዮጵያ በርካታ ብሄሮች፣ ብሄረሰቦችና  ህዝቦች ተፈቃቅረውና ተከባብረው እንዲሁም ተቻችለው  የሚኖሩባት አገር ናት። ኢትዮጵያ ከራሷ አልፋ ለቀጠናው አገራት ዘላቂ  ሰላም የሚተጋ  ጠንካራ መንግስት ያላት  አገር ናት።  አንዳንድ ቅን አስተሳሰብ ያላቸው ወይም የዋህ  ዜጎች ከቅርብ ጊዜ ወዲህ  በሚስተዋሉ  የትምክህትና ጥበት ሃይሎች አካሄድ አገር የምትፈርስ ህዝብ እርስ በርሱ  የሚጫረስ መስሏቸው ስጋት ተስምቷቸዋል። ይህ አስተሳሰብ ክፋት አለው ብዬ አላስብም። ስጋቱም ምክንያታዊ አይደለም ብዬ መከራከር አልፈልግም። ይሁንና ኢትዮጵያ   ማንም  ተነስቶ ዕለቱን የሚያፈርሳት፣ የተውገረገረች  አገር እንዳልሆነች ግን በዕርግጠኝነት መናገር  ይቻላል። ህብረተሰባችን ጠንካራ ማህበራዊ መስተጋብር ያለው ሃይማኖተኛ በርካታ የጋራ እሴቶች  ያሉት ህዝብ ነው።

አዲሲቷ ኢትዮጵያ  በህዝቦች ደምና አጥንት የተገነባች ህገመንግስታዊ አገር ናት። ከቅርብ ጊዜ ወዲህ የምናስተውላቸው  ምክንያታቸው በርካታ የሆኑ  ችግሮች  አሉ። መንግስትም በጥልቅ ተሃድሶ ወቅት  ችግሮች መኖራቸውን ተቀብሎ ለችግሮች መፍትሄ ለማፈላለግ የሚያደርገው ጥረት እንዳለ እንመለከታለን።  የአገራችንን ችግሮች ጠለቅ ብለን ብንመረምራቸው የበርካታዎቹ ችግሮች  ምንጫቸው የግል ጥቅም ፍለጋ (ኪራይ ሰብሳቢነት) ነው።  የኪራይ ሰብሳቢነት መገለጫ ከሆኑ ነገሮች መካካል ዋንኞቹ  የጥበትና ትምክህት አስተሳሰብና ተግባር ነው።

ጠባቦችና ትምክህተኞች  የአዲሲቷን ኢትዮጵያ ስኬት አይፈልጉም። የእነዚህ ሃይሎች መደበቂያ ሃይማኖትና ብሄር ነው።  ለእነዚህ የጥፋት  ሃይሎች  የህዝቦች አብሮነትና የጋራ ተጠቃሚነት አይታያቸውም።  የጥበትና ትምክህት  ሃይሎች  ዓላማቸውን ለማሳካት  ሁሌም  ነውጥና ሁከትን  ይመርጣሉ። ነውጥና ሁከት መፍጠርና በተለይ በብሄሮች መካከል የሚደረግ ግጭት የጥፋት ሃይሎች ዋንኛ ስትራቴጂ ነው። አሁን ላይ ይህ ሃይል ትኩረት ሰጥቶ እየሰራ ያለው በከፍተኛ ትምህርት ላይ ነው።  ዩኒቨርሲቲዎች  ከትምህርት ተቋምነት ወደ  ነውጥና ሁከት እንዲያመሩ ወላጆች ልጆቻቸውን  ከትምህርት ገበታቸው ላይ  ነጥለው እንዲወስዱ የተለያዩ ቅስቀሳዎችን በማድረግ ላይ ናቸው።

የጥበትና ትምክህት  ሃይሉ የጽንፈኛው የዳያስፖራ  ሚዲያዎችንና ማኅበራዊ ሚዲያዎችን  በመጠቀም  አገር እንዳበቃላት  አድርገው የተለያዩ መረጃዎችን በመንዛት ላይ ናቸው። አሁን ላይ የጥበትና ትምክህት ሃይሉ  ግንባር ፈጥረው አገር የሚያፈርስ እጅግ መርዛማ መረጃዎችን በማሰራጨት ህዝቦችን ዕርስ በርስ  ለማጋጨት ተግተው በመስራት ላይ ናቸው።  ነውጠኛ ሃይሎች  ድብቅ አጀንዳቸውን ለማሳካት ትኩረት አድርገው እየሰሩ ያሉት ደግሞ  ወጣቱ ላይ ነው።  የበሬ ወለደ ታሪክ በማቀነባበር ወጣቱን  ስሜታዊ የሚያደርጉና    ለጥፋትና በቀል የሚያነሳሱ መረጃዎችን  በማሰራጨት አገር ልትፈርስ እንደሆነ በማስመሰል ህብረተሰቡ ላይ ስጋት ለመፍጠር ጥረት በማድረግ ላይ ናቸው። ይህ አይነት ሃላፊነት የጎደለው አካሄድ ለማንም የሚበጅ አይደለም። የመልካም አስተዳደር ችግሮች  በተላይ ወጣቶችን በተመለከተ የሚስተዋሉ ችግሮች ሊቀረፉ የሚችሉት  ሰላም ሲረጋገጥ እንጂ በአመጻና ነውጥ አይደለም።

የነውጥ ሃይሎች  የጥፋት ተልኳቸውን ትኩረት አድረገው እየሰሩ ያሉት  የብሄር  ግጭቶች እንዲፈጠሩና እንዲስፋፉ ማድረግ ላይ  ነው። ግጭቶች እንዲፈጠሩና እንዲስፋፉ  ከማድረግ ጎን ለጎን በመልካም አስተዳደር በማጓደል በህዝብ  ተገምግመው ከሃላፊነታቸው የተሰናበቱ  ግለሰቦችን በማስተባበር በመንግስት ላይ ዘመቻ መክፈት  እንደአንድ ዘዴ እየተጠቀመበት ነው።  እነዚህ የጥፋት ሃይሎች  በዚህ አያበቁም በመልካም አስተዳደር ችግሮች የተማረሩ የህብረተሰብ ክፍሎችን በተለያየ ዘዴ  በመንግስት ላይ   ማነሳሳት ነው።  መንግስት የመልካም አስተዳደር ችግሮች መኖራቸውን አምኖ  ከህብረተሰቡ ጋር  መፍትሄዎችን በመስጠት ላይ ነው።     

መልካም አስተዳደር ማስፈን የዕለት ተግባር  አይደለም። ሁለም ችግሮች ዕለቱን አይፈቱም።  የመልካም አስተዳደር ችግሮችን ለመቅረፍ  መንግስት  የሚችለውን ሁሉ በማድረግ ላይ ነው። ይህ የመንግስት ጥረት ውጤታማ የሚሆነው በህዝብ ተሳትፎ  ሲታገዝ በመሆኑ ሁሉም ባለድርሻ አካል የበኩሉን አስተዋፅዖ ሊያበረክት ይገባል።  በየትኛውም መስክ ለጥፋት ሃይሎች የሚሆን ምቹ ምህዳርን ማሳጣት አንዱ የመንግስት ተግባር መሆን ይገባል። የተሰጣቸውን ህዝባዊ አደራ መወጣት የማይችሉና  ህዝባዊ ድጋፍ የሌላቸው፣ ለግል ጥቅማቸው ያደሩ አልፎ አልፎ ደግሞ ድብቅ የጥፋት ኃይሎች ፖለቲካዊ ተልዕኮ ይዘው በመንግሥት መዋቅር ውስጥ የተሰገሰጉ ኃይሎችን በፅናት መታገል  ያስፈልጋል። ህዝቡ የነውጥና የሁከት  ጋሻጃግሬዎች  እነማን እንደሆኑ ጠንቅቆ ያውቃል። በመሆኑም እነዚህን አካላት ለህግ አሳልፎ መስጠት ይኖርበታል።

መንግስት በጥልቅ ተሃድሶ ወቅት የተለዩትን ጉድለቶች ለማስተካከልና  የህዝብን ፍላጎትን ለማሟላት  የሚያስችሉ አሰራሮችን ለመዘርጋት የሚያደርገውን ጥረት አጠናክሮ መቀጠል ይኖርበታል። እስካሁንም መልካምናም ተጨባጭ   ውጤቶች በመመዝገብ ላይ ናቸው። ይሁንና አንዳንድ አካላት  ለምን  ሁሉም ነገር በአንዴ አልተስተካከለም ወይም አልተፈጸመም  በማለት ህብረተሰቡን ለነውጥና ለሁከት የሚያደርጉትን ሩጫ ማጋለጥ ተገቢ ነው። መንግስት ካቢኔን እንደገና እስከማዋቀር፣ ከፌዴራል እስከ ታችኛው የአስተዳደር እርከን ድረስ የሚገኙ ህግ የተላለፉ አስፈጻሚዎችና ፍጻሚዎችን ህግ ፊት የማቅረብ  እርምጃዎች ወስዷል። በመወሰድ ላይም ይገኛል።  ይሁንና አሁንም በርካታ ስራዎች መሰራት ይኖርባቸዋል።  ሁሉም ነገር ዕለቱን መፍትሄ ያገኛል ማለትም አይደለም።  ይሁንና በሂደት ነገሮች በመስተካከል ላይ ናቸው።  

ከላይ ለማንሳት እንደሞከርኩት  መልካም አስተዳደርን በማስፈን ረገድ የመንግስት ሚና ወሳኝ ቢሆንም  ካለህብረተሰቡ የነቃ ተሳትፎ የታሰበው ዓላማ ሊሳካ አይችልም። ለመልካም አስተዳደር  መረጋገጥ ቁልፉ ጉዳይ አሰራር መዘርጋት ነው።  አንዳንድ   አካላት  የመንግስት ሹማምንቶችን ከኃላፊነት ቦታቸው በማንሳት ወይም በማሰር መልካም አስተዳደርን የሚረጋገጥ መስሏቸው ከራሳቸው ፍላጎት በመነሳት እከሌ ከሃላፊነት ካለወረደ፤ እከሌ ካልታሰረ ወዘተ በማለት  መንግስት  መልካም አስተዳደርን ለማስፈን የሚያደርገውን ትግል ለማኮሰስ የተለያዩ  ውዥንብሮችን  በመንዛት ላይ ናቸው።  በእርግጥ ጥፋተኛ መጠየቅ ይኖርበታል፤ ነገር ግን ተጨባጭ ማስረጃ  ባለተገኘበት ሁኔታ  ማንንም  ከህግ ፊት ማቅረብ ደግሞ የግለሰቦችን ሰብዓዊና ዴሞክራሲያዊ መብቶችን መጋፋት ነው። ህገመንግስታዊ አካሄድም አይሆንም።  መልካም አስተዳደርን ለማስፈን ቁልፉ ነገር በማንኛውም ተቋም ውስጥ የአሰራር ስርዓት  መፍጠር፣ ተጠያቂነትን ማንገስ፣ ህብረተሰቡም አገልግሎት ለማግኘት የሚጠበቅበትን  መብትና   ግዴታ ጠንቅቆ  ተገንዝቦ መብቱን ማስከበር እንዲሁም ግዴታውን እንዲወጣ ተገቢውን ድጋፍ  ማድረግ  እንጂ ፈጻሚን በየጊዜው በመቀያየር የተፈለገውን ውጤት ይመጣል የሚል እምነት የለኝም።   

በአገራችን በርካታ ችግሮች አሉ። አንዳንድ ግለሰቦች  የፖለቲካ ትርፍ ለማግኘት ሲሉ  ሁሉንም ችግሮች ከመልካም አስተዳደር ጉድለት ጋር ለማስተሳሰር የሚያደርጉት ጥረት ሊወገዝ ይገባል።  ለአገራችን የሚበጃት  ሁሉንም  ችግሮች  በየፈርጁ ብንመለከታቸውና   በጋራ ሆነን መፍትሄ ብንፈልግላቸው እንጂ  በነውጥና ሁከት መፍትሄ እናመጣለን ማለት  ለአገራችንም ለህዝባችንም የሚበጃት አይሆንም። ስሜታዊነት ህዝብ ያጋጫል፣ አገርንም ያፈርሳል።  ስሜታዊነት  ምክንያታዊ እንዳንሆን  ያደርጋል። በአገራችን የሚስተዋሉ ሁሉም ችግሮች የመልካም አስተዳደር ችግሮች አይደሉም። በመንግስት የአቅም እጦት መንገድ ያልተዘረጋላቸው ወይም ውሃና ኤሌክትሪክ  ያልቀረበላቸው  አካባቢዎች  የመልካም አስተዳደር ችግር ተደርጎ መወሰድ የለበትም። 

ለአገራችን የሚበጃት ለችግሮቻችን መፍትሄ መፈለግ ያለብን በሰከነና ምክንያታዊ በሆነ መልኩ መሆን መቻል ይኖርብናል።  በአሁኑ ወቅት መንግስት ከህብረተሰቡ ጋር የፊት ለፊት ውይይት በማድረግ ችግሮችን በጋራ ለመፍታት የሚያስችሉ በርካታ መድረኮችን በማድረግ ላይ ነው። የአገራችን የዴሞክራሲ ስርዓት ጅምር ቢሆንም፤ መነጋገርና መወያየት  የሚያስችል  ፖለቲካዊ ስርዓት  በመገንባት ላይ ነው።  ይህን መልካም ጅምር ልንጠቀምበት ይገባል። መስማማት ወይም አለመስማማት አንድ ነገር ሆኖ፤  ቁጭ ብሎ መነጋገር  መቻል  በራሱ የመጀመሪያውና ትልቁ መልካም  ነገር ነው። 

ባለፉት 27 ዓመታት በተለይ ደግሞ ባለፉት 15 ዓመታት በአገራችን በርካታ የልማትና የዴሞክራሲያዊ ስርዓት ግንባታ ሂደቱን የሚያጎለብቱና የሚያፋጥኑ ተግባራት በመከናወን ላይ ናቸው። እየተመዘገቡ ካሉ  ስኬቶች ህብረተሰቡ በየደረጃው  ፍትሃዊ የልማት ተጠቃሚ ለማድረግ ጥረት  እየተደረገ ነው። ተጨባጭ ውጤቶችም ታይተዋል። ይሁንና መልካም አስተዳደር በማስፈን ረገድ ያልተፈቱና ህዝቡን እያማረሩ  ያሉ በተለይ የአገልግሎት አሰጣጥ ላይ የሚስተዋሉ ችግሮች  መኖራቸው  ገሃድ ነው። እነዚህን ችግሮች ለመፍታት እያንዳንዱ ዜጋ  ከመንግሥት ጋር ተቀናጅቶ መሥራት ይኖርበታል። ይህ ካልሆነ  የመንግስት ጥረት ብቻውን ውጤታማ ሊሆን አይችልም። 

 

በሰሜን ጎንደር አካባቢ የተፈጠረውን ሁከት የፀጥታ ሀይሎች ከህብረተሰቡ ጋር በመሆን በሰሩት ስራ መቆጣጠር ተችሏል- መንግስት

በሰሜን ጎንደር ዞን አካባቢ የተፈጠረውን ሁከት የፀጥታ ሀይሎች ከህብረተሰቡ ጋር በመሆን በሰሩት ስራ መቆጣጠር መቻሉን የመንግሥት ኮሙዩኒኬሽን ጉዳዮች ፅህፈት አስታውቋል።

የመንግሥት ኮሙዩኒኬሽን ጉዳዮች ፅህፈት ቤት ሃላፊ ሚኒስትር አቶ ጌታቸው ረዳ ከፋና ብሮድካስቲንግ ኮርፖሬት ዜና መጽሄት ጋር ባደረጉት ቆይታ፥ “በአካባቢው ላይ የተለያዩ የህረተሰብ ጥያቄዎችን ይዘናል በማለት የሚንቀሳቀሱ ቡድኖች ጥያቄውን እንደ ምሽግ በመጠቀም ከኢትዮጵያ ጠላቶች የሚሰጣቸውን መመሪያ ሲፈጽሙ ቆይተዋል” ብለዋል።

“በዚህም የብሄራዊ መረጃና ደህንነት አገልግሎት እና የፌደራል ፖሊስ የጋራ ፀረ ሽብር ግብረ ሀይል እነዚህን ሰዎች በቁጥጥር ስር ለማዋል በሚሞክርበት ሰዓት ግለሰቦቹ በማሰሪያ ትእዛዝ ላይ ተሞርክዞ የቀረበላቸውን ጥያቄ አሻፈረኝ በማለት በፖሊሶች ላይ የጥይት እሩምታ በማውረድ ለሰላማዊ ሰዎች እና ለፖሊሶች ህይወት ማለፍ ተጠያቂ የሆኑበት ሁኔታ ተፈጥሯልም” ብለዋል።

በተጨማሪም በትናንትናው እለት ህፃናትን እንደ ጋሻ በመጠቀም እና ተኩስ በመክፈት በጸጥታ ሀይሎች ላይ ጉዳት ሲያደርሱ መቆየታቸውንም አቶ ጌታቸው ረዳ ተናግረዋል።

የግለሰቦቹ ተግባር እናራምደዋለን ከሚሉት ወይም የህብረተሰቡ ጥያቄ ነው የሚሉትን እንቅስቃሴን እንደ ሽፋን ተጠቅመው የሁከት እና የግርግር ስራ ሲሰሩ እንደነበረ አስታውቀዋል።

ይህን ተግባር በማስፋፋትም ደጋፊዎቻችን ናቸው በሚሉት ጥቂት ሰዎች አማካኝነት የጠላት አላማ ለማሳካት የሚያስችሉ በተለያዩ አካባቢዎች ግርግር እና ሁከት ለመፍጠር ጥረት አድርገዋልም ብለዋል።

እንዲሁም ችግሩ በሌሎች አካባቢዎች እንዲዛመት እና ሁከቱ እንዲባባስ የሚያስችል ስራ ለመስራት መሞከራቸውን አንስተዋል።

በተለይም በሌሎች አካባቢ ተወላጆች ላይ የብሄር ትንኮሳ በማድረግ ጉዳዩ ሌላ መልክ እንዲይዝ እና ሁከቱ ወደ ለየለት ብጥብጥ እንዲሸጋገር የሚያስችል ተግባራትን ሲፈጽሙ እንደቆዩም አቶ ጌታቸው አብራርተዋል።

ነገር ግን ህዝቡ ከጸጥታ ሀይሎች ጋር በመሆን በሰራው ስራ እንዲሁም የክልሉ የጸጥታ ሀይል ከፌደራል ፖሊስ ጋር በመሆን በሰሩት ስራ የጥፋት ሀይሎቹ ፍላጎት በሚፈልጉት ደረጃ ስኬታማ ሊሆን እልቻለም ሲሉም ተናግረዋል።

በዛሬው እለትም ሁከቱ እንዳይባባስ ከአካባቢው ህብረተሰብ ጋር በመሆን ነዋሪው በተረጋጋ መልኩ የእለት ተእለት ተግባሩን እንዲከውን እና በዛሬው እለት የተጠናቀቀውን የከፍተኛ ትምህርት መግቢያ ፈተና ያለምንም ችግር ተማሪዎች እንዲፈተኑ መደረጉንም አንስተዋል።

እንዲሁም ከጎንደር ወጣ ባሉ አካባቢዎች በተለይም በአንድ አካባቢ ላይ ይህን ሁከት ለማስፋፋት ባደረጉት ጥረት የጠፋ የሰው ህይወት እና የወደመ ንብረት አለ ያሉት አቶ ጌታቸው፥ እነዚህን በቁጥጥር ስር ለማዋል የሚያስችል ስራዎች መሰራታቸውንም ጠቁመዋል።

በቀጣይም ከህብረተሰቡ ጋር በመሆን በሰላማዊ አጀንዳ ስም የሚንቀሳቀሱትን ወገኖች ለህግ እንዲቀርቡ የማድረግ ስራ እና አካባቢው ወደ ነበረበት ሰላማዊ እንቅስቃሴ የመመለስ ስራ ተጠናክሮ ይቀጥላልም ብለዋል።

ከትናንት በስቲያ እና ትናንት በሁከት ፈጣሪዎች አማካኝነት በተፈጠረው ሁከት እና ግርግር ሳቢያ፥ አምስት ንፁሃን ዜጎች በተባራሪ ጥይት ህይወታቸው ማለፉን የብሄራዊ መረጃና ደህንነት አገልግሎት እና የፌደራል ፖሊስ የጋራ ፀረ ሽብር ግብረ ሀይል ለፋና ብሮድካስቲንግ ኮርፖሬት በላከው መግለጫ ላይ መግለፁ ይታወቃል።

ከዚህም በተጨማሪ ከፌደራል እና ከክልሉ የፀጥታ ሀይሎች ተጨማሪ ጉዳት መድረሱንም ነው ግብረ ሃይሉ በመግለጫው የጠቆመው።

በተፈጠረው ሁከት ሳቢያ በሰላማዊ ዜጎች እና የንግድ ቤቶች ላይ ጉዳት የደረሰ ሲሆን፥ የፌደራል እና የክልሉ የፀጥታ ሀይሎች ተጨማሪ ጉዳት ከመድረሱ በፊት ሁኔታውን በቁጥጥር ስር ማዋላቸውንም ገልጿል።

የጋራ ግብረ ሀይሉ በመግለጫው በህቡዕ በመደራጀት የሽብር ተግባር በመፈፀም የህዝቡን ሰላም እንዲታወክ ከማድረግ ባለፈ እነርሱ እንደሚሉት ከማንኛውም አይነት ሰላማዊ እና ህጋዊ ጥያቄ ጋር ምንም ትስስር የሌለው ህጋዊ እርምጃ እየተወሰደ መሆኑን አመላክቷል።

በመግለጫው በቁጥጥር ስር የዋሉት ግለሰቦች ኤርትራ ውስጥ መሽገው ከሚገኙ የፀረ ሰላምና አሸባሪ ሀይሎች ጋር ቀጥተኛ ግንኙነት በመፍጠርና መመሪያ በመቀበል በአማራ ክልል ሰሜን ጎንደር ዞን ጠገዴ ወረዳ ሶሮቃና ቁርቢ አካባቢ እንዲሁም ትግራይ ክልል ምዕራባዊ ዞን ፀገዴ ወረዳ ደንሻና አካባቢው ሲንቀሳቀሱ የነበሩ መሆናቸውን ነው የተጠቀሰው።አዲስ አበባ፣ ሀምሌ 7፣ 2008 (ኤፍ.ቢ.ሲ)

የአድዋ ድል የጥቁር ሕዝቦች የጸረ ቅኝ አገዛዝ ትግል ሕያው ምስክር

ጀግኖች አባቶቻችን የውጭ ወራሪዎችንና ቅኝ ገዥዎችን በከፍተኛ የሃገር ፍቅር፣ ወኔ፣ ጽናትና ጀግንነት በመታገል ተደጋጋሚ ሽንፈትን እንዲጎነጩ አድርገው በመመለስ አኩሪ ታሪክ ፈጽመዋል። በዚህም ከጥንት ጀምሮ ነጻነቷን አስጠብቃ የኖረች፣ በጸረ ቅኝ አገዛዝ ትግል ፋና ወጊ የሆነችና ትውልድ ሁሉ የሚኮራባትን ሃገር በደማቸው ዋዥተው በክብር አስረክበውን አልፈዋል። ለዚህም በየዘመኑ የተነሱ ቅኝ ገዥዎችንና ወራሪዎችን በጽናት በመታገል የሃገራችንን ሉአላዊነት በአስተማማኝነት አስከብረው ክብርና ሞገስ ላጎናጸፉን ጀግኖች አባቶቻችን ያለን ከበሬታ የላቀ ነው።

ኢትዮጵያ ለነጻነቷ፣ ለሉአላዊነቷና ለብሔራዊ ክብሯ መጠበቅ ታላቅ መሰዋዕትነት ከፍላ ድል ከተጎናጸፈችባቸው የወረራና የፀረ ቅኝ አገዛዝ የትግል አውዶች መካከልም በ1888 ከወራሪው የኢጣልያ ጦር ጋር በአድዋ ያደረገችው ፍልሚያና ያገኘችው አንጸባራቂ ድል በታሪክ ትልቅ ስፍራ ይዞ ይገኛል። በወቅቱ ከመላ ሃገሪቱ የተውጣጡ ጀግኖች አባቶቻችን ከጫፍ ጫፍ በመጠራራት ወራሪውን ኃይል በጋራ ለማንበርከክ የከፈሉት አኩሪ መስዋዕትነት በየዘመናቱ ላለው ተተኪ ትውልድ ህያው የታሪክ ምስክርነትና አርያነት ትቶ ያለፈ በመሆኑ ፋይዳው የጎላ ነው። ይህ ዘመን ተሻጋሪ የድል ቀንም በሃገራችን በየዓመቱ የሚታወስና በታላቅ ድምቀት የሚከበር እንደመሆኑ፣ ድሉ የመላ ኢትዮጵያውያን አንዱ የማንነት መገለጫና የብሔራዊ ኩራት ምንጭ ሆኖ ቀጥሏል። በመሆኑም የዘንድሮው 120ኛው ዓመት የአድዋ ድል በዓል የካቲት 23 /2008 "ብዝሃነትን ያከበረችው አዲሲቷ ኢትዮጵያ የአድዋ ድልን ህያው ማድረግ ችላለች!!" በሚል መሪ ቃል በድምቀት ይከበራል።

የአድዋ ድል ከኢትዮጵያም አልፎ በአፍሪካና በመላው ጥቁር ሕዝቦች የነጻነትና የጸረ ቅኝ አገዛዝ ትግል ውስጥ ፋና ወጊ የድል ብስራት ሆኖ ሲዘከር የኖረና ያለ አንጸባራቂና ህያው ታሪክ ነው። ይህ አኩሪ መስዋዕትነት የተከፈለበት ታላቁ የነጻነት ተጋድሎ ድሉ ከተገኘበት ዕለት ጀምሮ ታሪካዊነቱና አሻራው ሳይደበዝዝ እነሆ አሁንም ድረስ በክብር እየተዘከረ ይገኛል።

የአድዋ ጦርነትና የኢትዮጵያውያን ድል ወራሪዎችን ያሳፈረ፣ በበርካታ ታዋቂ የውጭ የታሪክ ተመራማሪዎችና ጸሐፊዎች ጭምር ብዙ የተባለለትና በሌላም በኩል ለመጀመሪያ ጊዜ መላ ጥቁር ሕዝቦችን ለነጻነት ተጋድሎ ያነሳሳ በመሆኑ በጥቁር ሕዝቦች ታሪክ ውስጥ ትልቅ ስፍራ የሚሰጠው ነው። በተለይም በወቅቱ ጥቁር ሕዝቦች በቅኝ ገዥዎች ላይ ይህን ዓይነት አንጸባራቂ ድል ሲጎናጸፉ በታሪክ ለመጀመሪያ ጊዜ ስለነበር የወራሪውን የጣሊያንን መንግሥታዊ መዋቅር ከመሰረቱ ያናጋና ቅኝ ገዥዎችን ያሸማቀቀ ነበር። ይህ በመሆኑም ክስተቱ የመላውን ዓለም ትኩረት በእጅጉ የሳበና ያስደመመ እንደነበር በርካታ የታሪክ ድርሳናት ምስክርነታቸውን ችረውታል።

መላ የሃገራችን ሕዝቦች ሆይ!
ለቅኝ ገዥዎችና ወራሪዎች የአልምበረከክም ባይነት የትግል ወኔአችንና ቁርጠኝነታችን ዛሬም ድህነትን በመዋጋት የሃገራችንን የሕዳሴ ጉዞ የምናፋጥንበትና በመጨረሻም ስኬት የምናስመዘግብበት ሊሆን ይገባል። በመሆኑም ይህ ትውልድ ከአባቶቹ የወረሰውን አኩሪ የጀግንነት ወኔ ተላብሶ በድህነት ላይ መዝመትና ድልን መጎናጸፍ ከፊት ለፊቱ ያለ ታሪካዊ አደራ ነው። በዚህ ረገድም ሃገራችንን ከድህነትና ከኋላ ቀርነት በማላቀቅ አስተማማኝ ኢኮኖሚያዊ ብልጽግና ለማረጋገጥና በዚህም አንድ ጠንካራ ፖለቲካዊና ኢኮኖሚያዊ ማህበረሰብ ለመፍጠር እየተደረገ ባለው ዘርፈ ብዙ ጥረት ውስጥ መላ የኢትዮጵያ ሕዝቦች እንደከዚህ ቀደሙ ሁሉ በቀጣይም በቁርጠኝነት በጋራ ሊንቀሳቀሱ ይገባል።

ከቅርብ ዓመታት ወዲህ ሃገራችን በፈጣን የዕድገት ግስጋሴ ውስጥ በማለፍ እያስመዘገበችው ያለውን ስኬት አጠናክረን ማስቀጠል ከቻልን በጣም ባጠረ ጊዜ ውስጥ መካከለኛ ገቢ ካላቸው ሃገራት ተርታ እንደምንሰለፍ የእስካሁኑ ጉዞአችን ግልጽ ማሳያ ነው። እንደ ቀደምት የጸረ ቅኝ አገዛዝ ተጋድሎአችንና እንዳስመዘገብነው ድል ሁሉ ዛሬ ላይም በሀገራችን እየታዬ ያለው ፈጣን ዕድገትና ለውጥ የውጭውን ዓለም ትኩረት ጭምር እየሳበና ትልቅ አድናቆት እየተቸረው ይገኛል።
ቀደምት አባቶቻችን ከውጭ ወራሪዎችና ቅኝ ገዥዎች ጋር እንዳደረጉት የነጻነት ፍልሚያ ሁሉ የኢትዮጵያ ሕዝቦች ለዘመናት ከራሳቸው በወጡ ጨቋኝ ገዥዎች ተጭኖባቸው ከነበረው አፋኝና ኢ-ዴሞክራሲያዊ አገዛዝ ለመላቀቅ የያደረጉት መራር ትግል ፍሬ አፍርቶ በግንቦት 20 /1983 ድልን ሊጎናጸፉ ችለዋል። በዚህም የብሔሮች፣ ብሔረሰቦችና ሕዝቦች እኩልነት፣ ዴሞክራሲያዊ መብት፣ ማህበራዊ ፍትህና ሰላም የተረጋገጠባት አዲሲቷን ፌዴራላዊት ኢትዮጵያን በጋራ ትግላቸውና በከፈሉት አኩሪ መስዋዕትነት እውን ማደረግ ችለዋል። ብዝሃነትን በእኩልነት ያረጋገጠ ዴሞክራሲያዊ ሥርዓት እውን በመሆኑም ዛሬ መላ የሃገራችን ሕዝቦች ፊታቸውን ሙሉ ለሙሉ ወደ ልማት በማዞር ፈጥነው ከድህነትና ኋላ ቀርነት ለመላቀቅ ከፍተኛ ርብርብ በማድረግ ላይ ይገኛሉ። በዚህም ሌላ አዲስ የዕድገትና የለውጥ ታሪክ በመስራት ስኬት እያስመዘገቡ መጥተዋል። ይህ ዛሬ ላይ በተጨባጭ እየታዬ ያለው ሁለንተናዊ ዕድገትም የግንቦት 20 የትግል ውጤት በመሆኑ መላ ዜጎቻችን የሚኮሩበት ሌላው ድል ነው።

መላ የሃገራችን ሕዝቦች ከድህነት ፈጥነው ለመውጣት እያደረጉት ያለውን እልህ አስጨራሽ ትግል በማደናቀፍ የራሳቸውን ርካሽ ፍላጎት ተፈጻሚ ለማድረግ በተለያዬ ስልት የሚንቀሳቀሱ ማናቸውንም ጸረ ልማትና ጸረ ሰላም ኃይሎችን በጽናት በመታገልና እኩይ ዓላማቸውን በማምከን የተጀመረውን ዘርፈ ብዙ ልማት ማስቀጠል የሞት ሽረት ጉዳይ ነው። በመሆኑም አሁን ያለው ትውልድ የጦር ሜዳ ጀግንነታችንንና ድላችንን በልማት አርበኝነት በመድገምና ዕድገታችንን በማፋጠን ታሪክ ሰሪነቱን በተግባር እንደሚያረጋግጥና በዚህም የሃገራችንን ጥንታዊ ገናናነት እንደሚያድስ ከምን ጊዜውም በላይ ዛሬ እርግጠኞች ነን።

በመጨረሻም 120ኛውን ዓመት የአድዋ ድል በዓል ስንዘክር ልማታችንን በማፋጠን የሃገራችንን ሕዳሴና ብልጽግና እውን ለማድረግ የጋራ ቃል ኪዳናችንን በድጋሚ የምናድስበት እንደመሆኑ መላ የሃገራችን ሕዝቦች እንኳን ለ120ኛው ዓመት የአድዋ ድል በዓል አደረሳችሁ፣ አደረሰን 

— 20 Items per Page
Showing 9 results.
የመንግስት ኮሙዩኒኬሽን ጉዳዮች ጽ/ቤት
ፖ ሳ ቁጥር: 1364/530
ስልክ ቁጥር: +251-115-52-81-13
:+251-115-52-81-92
ፋክስ : +251-115-52-20-60
: +251-115-54-25-87
Follow Us
Facebook
google +
youtube
twitter
© 2016 የኢፌድሪ መንግስት ኮሙዩኒኬሽን ጉዳዮች ጽ/ቤት