ዜና ዜና

ኢትዮጵያ ለጂቡቲና ለሱዳን ከሸጠችው የኤሌክትሪክ ሃይል ከ49 ሚሊየን ዶላር በላይ ገቢ አገኘች

ኢትዮጵያ ባለፉት 10 ወራት ከኤሌክትሪክ ሃይል ሽያጭ በአጠቃላይ ከ3 ነጥብ 8 ቢሊየን ብር በላይ ገቢ ማግኘቷን የውሃ መስኖና ኤሌክትሪክ ሚኒስቴር ገለፀ።

በ2009 በጀት ዓመት ባለፉት 10 ወራት ከኤሌክትሪክ ሃይል ለመሰብሰብ የታቀደው ከ4 ነጥብ 7 ቢሊየን ብር በላይ እንደነበርም ነው ሚኒስቴሩ የገለፀው።

የሚኒስቴሩ የህዝብ ግንኙነት ሃላፊ አቶ ብዙነህ ቶልቻ እንደገለጹት፥ በ10 ወራት ውስጥ ከተሰበሰበው አጠቃላይ ገቢ ውስጥ ከ49 ሚሊየን 400 ሺህ የአሜሪካ ዶላር በላይ ገቢው የተገኘው ለሱዳን እና ለጂቡቲ ከተሸጠ የኤሌክትሪክ ሃይል ሽያጭ ነው፡፡

ሀገሪቱ ለታንዛኒያ 400 ሜጋ ዋት የኤሌክትሪክ ኃይል ለመሸጥ የሚያስችል ስምምነት ማድረጓም ይታወሳል፡፡

ከኢትዮጵያ የኤሌክትሪክ ኃይል ገዝተው መጠቀም የጀመሩት ሱዳን እና ጅቡቲም ተጨማሪ ኃይል ጠይቀዋል፡፡

በቀጣይ ሀገራቱ የጠየቁትን የኃይል ፍላጎት ለማቅረብ ተጨማሪ መስመሮችና የማከፋፈያ ጣቢያዎችን ለመሥራት ጥናት እየተደረገ ነው ተብሏል፡፡

ኬንያም 200 ሜጋ ዋት ለመግዛት የጠየቀች ሲሆን ሃይሉን ለማቅረብ የመስመርና የማከፋፈያ ጣቢያ ግንባታ ፕሮጀክት ተፈርሞ ወደ ሥራ ተገብቷል።

ኢትዮጵያ ለጎረቤት ሀገራት እያቀረበች ያለችው የኤሌክትሪክ ኃይል የሀገራቱን ኢኮኖሚያዊ ግንኙነት በማጠናከርና የልማት ትስስሩን በማፋጠን ላይ ይገኛል።

ሀገሪቱ ግዙፍ የሃይል ማመንጫ ግድብ ፕሮጀክቶቿን ስታጠናቅቅ፥ ለሌሎች ጎረቤት ሀገራትም የኤልክትሪክ ሃይል ለመሸጥ ቅድመ ሁኔታዎችን እያመቻቸች ነው፡፡

አዲስ አበባ፣ ግንቦት 10፣ 2009 (ኤፍ ቢ ሲ)