ዜና ዜና

በኢፌዴሪ የመንግስት ኮሙዩኒኬሽን ጉዳዮች ጽ/ቤት የተዘጋጀ ሳምንታዊ አቋም መግለጫ መጋቢት 22 ቀን 2009 ዓ.ም

በህዳሴው ግድብ ግንባታ የጀመርነውን ታላቅ ገድል ከዳር ለማድረስ እንረባረብ!

የታላቁ ህዳሴ ግድብ ግንባታ የመሰረት ድንጋይ የተጣለበት 6ኛ ዓመት በዓል "ታላቁ የህዳሴ ግድባችን የሀገራችን ህብረ-ዜማ፣ የህዳሴያችን ማማ!" በሚል መሪ ቃል ከነገ በስቲያ መጋቢት 24 ቀን ጉባ ላይ ይከበራል።

የዛሬ ስድስት ዓመት በቀድሞው ጠ/ሚ ታላቁ መሪ መለስ ዜናዊ የቀረበውን ጥሪ በመቀበል መላው የኢትዮጵያ ብሄሮች፣ ብሄረሰቦች እና ህዝቦች ለግንባታው ስኬት ያደረጉት የገንዘብ፣ የጉልበት፤ የፖለቲካ እና የዲፕሎማሲ ድጋፍ የዘመናችን ትልቁ ገድል ሊባል የሚችል ነው። በመሆኑም እነሆ በመነሻው ወቅት ለብዙዎች ህልም ይመስል የነበረው ትልማችን ዛሬ ወደሚታይና ወደሚዳሰስ ተጨባጭ ልማት ተቀይሮ በአሁኑ ጊዜ የግድቡ ግንባታ 56 በመቶ ሊደርስ ችሏል፡፡ ከጅምሩ አንስቶ የታየው ህዝባዊ ተሳትፎና ድጋፍ አሁንም ቢሆን በከፍተኛ ግለት የቀጠለ ሲሆን የኢፌዴሪ መንግስት ለመላው የኢትዮጵያ ብሄሮች፣ ብሄረሰቦች እና ህዝቦች እንኳን ለበዓሉ አደረሳችሁ እያለ በዚህ አጋጣሚ ምስጋናውን ያቀርባል።

ባለፉት ስድስት ዓመታት መላው ህዝባችን በቦንድ ግዢና ልገሳ እንዲሁም ሌሎች ድጋፎች ባደረገው ርብርብ ከ9.6 ቢሊዮን ብር በላይ ለግድቡ ግንባታ ማሰባሰብ የተቻለ ሲሆን ግድቡ በደለል እንዳይሞላም የአገራችን አርሶ አደሮችና አርብቶ አደሮች ከቦንድ ግዢ በተጨማሪ በዓመት ከ30 የስራ ቀናት በላይ በእርከን ስራ ላይ በመሰማራት በቢሊዮን ብር የሚገመት የጉልበት አስተዋጽዖ አበርክተዋል፡፡ ባለሃብቶች እንዲሁም በመላው ዓለም የሚኖሩ ኢትዮጵያውያንና ትውልደ ኢትዮጵያውያንም በተለያዩ መንገዶች ድጋፍ እያደረጉ በግድቡ ላይ የበኩላቸውን አሻራ በማኖር ላይ ናቸው፡፡

የኢፌዴሪ መንግሥት በበኩሉ መላው የኢትዮጵያ ህዝቦችን ከማስተባበርና የግንባታውን ሂደት ከመምራት ባሻገር፡ ከታችኛው የተፋሰሱ አገራት ጋር በሳል የዲፕሎማሲ ግንኙነት ሲያካሂድ ቆይቷል። በዚህ ጥረትም የታችኛው የተፋሰሱ አገራት፡ ግድቡ በውሃ አጠቃቀማቸው ላይ ጉልህ ጉዳት እንደማያደርስባቸው እየተገነዘቡ መጥተዋል፡፡

በአጠቃላይ ታላቁ የኢትዮጵያ ህዳሴ ግድብ ግንባታ ኢትዮጵያውያንን ሁሉ በአንድነት ያሰለፈ፤ ለዘመናት ተጠናውቶን የነበረውን ‹የአልችልም› መንፈስ የሰበረና በምትኩ የይቻላል መንፈስን ያቀዳጀ የዘመናችን ታላቅ ገድል ነው። በመሆኑም አገራችንን ወዳሰብንበት የእድገት ከፍታ ለማውጣት መንግሥትና ህዝብ እጅ ለእጅ ተያይዘው እየፈጸሙት ያለውን ይህንን አስደማሚ ገድል አጠናክረን እንድንቀጥል የኢፌዴሪ መንግሥት በዚህ አጋጣሚ ጥሪውን ያቀርባል።