ዜና ዜና

በሃገሪቱ እየመጣ ላለው ለውጥ የአማራና የኦሮሞ ህዝቦች ተሳትፎ ከፍተኛ ነው…አቶ ጃዋር መሀመድ

አሁን በኢትዮጵያ እየታየ ላለው ለውጥ የአማራና የኦሮሞ ህዝቦች በጋራ ከፍተኛ ሚና መጫዎታቸውን የኦሮሞ ሚዲያ ኔትወርክ ስራ አስኪያጅ አቶ ጃዋር መሃመድ ገለጹ።

በእሳቸው የሚመራ ቡድን ዛሬ ማምሻውን ባህርዳር ከተማ ሲገባ የክልሉ ከፍተኛ አመራሮች አቀባበል አድርገውለታል፡፡

አቶ ጃዋር ወደ ክልሉ የመጡት የአማራና ኦሮሞ ህዝቦችን "ተፈጥሯዊ ትስስር ለማጠናከር" እና የክልሉ ህዝብና መንግሥት ለውጡ እውን መሆን ላበረከቱት አስተዋጽኦ ምስጋና ለማቅረብ መሆኑ ተናግረዋል፡፡

የሁለቱ ክልል ህዝቦች ተፈጥሯዊ ቁርኝት ያላቸው ብቻ ሳይሆኑ በታሪክም የማይነጣጠሉ፣ ሊነጣጠሉም የማይችሉና የማይገባቸው ዘላቂ ግንኙነት ያላቸው ህዝቦች መሆናቸውን አብራርተዋል።

ይህን ለዘመናት የዘለቀ ግንኙነት ወደ ላቀ ደረጃ ለማሳደግም በምሁራን፣ በአመራሩና በህዝቡ ዘንድ ሰፊ ውይይት ማድረግ አስፈላጊ እንደሆነ አስገንዝበዋል።

ለውጡን ያመጣው የአብሮነት ሂደት ወደ ላቀ ደረጃ እንዲደርስ እርሳቸውም እገዛ እንደሚያደርጉ ነው አቶ ጀዋር ያረጋገጡት።

 አሁን በሃገሪቱ የመጣው የተስፋ ጭላንጭል የበለጠ ቦግ ብሎ እንዲበራ የሁለቱ ክልል ህዝቦች ከፍተኛ ሚና እንዳላቸው ጠቁመዋል።

የሁለቱ ክልል ህዝቦች በሰላም አብሮ መኖር ብቻ ሳይሆን የላቀ ትብብር ማምጣት ለሃገሪቱ አንድነት፣ ለዴሞክራሲና ሰላም ወሳኝ እንደሆነ ጠቁመው፤ በቆይታቸውም ይህንን የሚያጠናክር ውይይት ይደረጋል ብለዋል።

የአማራ ክልል ርዕሰ መስተዳድር አቶ ገዱ አንዳርጋቸው በበኩላቸው በአቶ ጀዋር መሃመድ የሚመራው የልኡካን ቡድን ወደ ባህር ዳር በመምጣቱ በክልሉ ህዝብ ስም አመስግነዋል።

"በቆይታቸውም ወደፊት የህዝብ ለህዝብ ግንኙነቱን ለማጠናከር በሚረዱ ተግባራት ላይ ውይይት ይደረጋል" ብለዋል።

 ባህር ዳር ነሐሴ 3/2010(ኢዜአ)