ዜና ዜና

በመጋቢት ወር የነዳጅ ምርቶች ዋጋ መሸጫ በነበረበት ይቀጥላል

የመጋቢት ወር የነዳጅ ምርቶች የችርቻሮ መሸጫ ዋጋ ባለበት እንደሚቀጥል የንግድ ሚኒስቴር አስታወቀ።

የሚኒስቴሩ መግለጫ  እንደሚያመለክተው  በመጋቢት ወር፥ ከአውሮፕላን ነዳጅ በስተቀር የሌሎቹ ነዳጅ ምርቶች መሸጫ ዋጋ በነበረበት ይቀጥላል ብሏል።

የአውሮፕላን ነዳጅ ዋጋ በአዲስ አበባ በየካቲት ወር ሲሸጥበት ከነበረው 23 ብር ከ08 ሳንቲም፥ በመጋቢት ወር በ16 ሳንቲም ጭማሪ በማድረግ 23 ብር ከ24 ሳንቲም እንደሚሸጥም ሚኒስቴሩ ገልጿል።

በዓለም አቀፍ ገበያ የሚኖረውን የነዳጅ ዋጋ መነሻ በማድረግም እንደ አስፈላጊነቱ የዋጋ ማስተካከያ ሊደረግ እንደሚችል ሚኒስቴሩ በመግለጫው ጠቁሟል።

የካቲት 28፣ 2010 (ኤፍ.ቢ.ሲ)