ዜና ዜና

ኢትዮጵያና ቬንዙዌላ የሁለትዮሽ ግንኙነታቸውን ለማጠናከር ተስማሙ

ኢትዮጵያና ቬንዙዌላ የሁለትዮሽ ግንኙነታቸውን ለማጠናከር እንደሚሰሩ የአገራቱ የውጭ ጉዳይ ሚኒስትሮች ተስማሙ። 

ዶክተር ወርቅነህ ገበየው የቬንዙዌላ አቻቸው ጆርጅ አሬያዛን በጽህፈት ቤታቸው ተቀብለው አነጋግረዋል።   

ዶክተር ወርቅነህ በዚሁ ወቅት እንደገለጹት የሁለቱ አገራት ግንኙነት ለበርካታ ዓመታት የቆየ ነው።  

በመጀመሪያ ደረጃ ትምህርት ቤት ግንባታና የኢትዮጵያ የተወሰኑ ተማሪዎች ወደ ቬንዙዌላ ሄደው እንዲማሩም ነፃ የትምህርት ዕድል በመስጠት ድጋፍ ማድረጓን ገልጸዋል።  

''እንዲያም ሆኖ አገራቱ ያላቸው ግንኙነት የሚጠበቀውን ያህል ጠንካራ አልሆነም" ያሉት ሚኒስትሩ በቀጣይ በጋራ ሊሰሩባቸው በሚችሉበት ጉዳዮች ላይ መክረዋል።  

ቬንዙዌላ በደቡብ አሜሪካ ከፍተኛ ሚና የምትጫወትና የነዳጅ ኃብት ያላት አገር መሆኗም ለቀጣይ የትብብር ሥራዎች ከኢትዮጵያ ጋር ለመሥራት መስማማቷን ዶክተር ወርቅነህ አንስተዋል። 

በዚህም ግንኙነቱን አሁን ካለበት ከፍ ወዳለ ደረጃ ለማሸጋገር እንደሚሰሩ ገልጸዋል።  

የቬንዙዌላ የውጭ ጉዳይ ሚኒስትር ጆርጅ አሬያዛን በበኩላቸው አገራቸው ከኢትዮጵያ ጋር ያላትን ግንኙነት ለማጠናከር ፍላጎት እንዳላት አመልክተዋል። 

በዚህም መሰረት በግብርና ፣ በኃይል ልማት ፣ በትምህርትና በአገልግሎት ዘርፍ ላይ በጋራ ለመሥራት እንደሚፈልጉ አረጋግጠዋል። 

በትምህርት ዘርፍ ደግሞ በተለይም በሕክምናው ዘርፍ በርካታ ተማሪዎች ከኢትዮጵያ ወደ ቬንዙዌላ ሄደው ነፃ የትምህርት ዕድል እንዲያገኙ ፍላጎት እንዳላቸው ጠቁመዋል።  

በሌላ በኩል በአየር ትራንስፖርት ግንኙነት በመፍጠር አገራቱ ይበልጥ አጋርነታቸውን ለማሳደግ እንደሚሰሩ አስረድተዋል።  

የኢትዮጵያና የቬንዙዌላ የሁለትዮሽ ግንኘነት በ1956 ዓ.ም መጀመሩን ከውጭ ጉዳይ ሚኒስትር የተገኘው መረጃ ያመለክታል።

የካቲት 17/2010/ኢዜአ