ዜና ዜና

የሶማሊያ መንግስት የልኡካን ከአማራ ክልል ምክር ቤት ጋር በፌደራሊዝም ስርዓት ዙሪያ የልምድ ልውውጥ አደረጉ

በኢትዮጵያ ጉብኝት በማድረግ ላይ የሚገኙት የሶማሊያ ሪፐብሊክ መንግስት የልኡካን ቡድን አባላት ከአማራ ክልል ምክር ቤት አባላት ጋር በፌደራሊዝም ስርዓት አወቃቀር ዙሪያ በባህር ዳር ከተማ የልምድ ልውውጥ አድርገዋል።

የአማራ ክልል ምክር ቤት አፈ ጉባኤ አቶ ይርሳው ታምሬ በልምድ ልውውጡ ላይ እንደተናገሩት፥ "የጎረቤት ሀገር ሶማሊያ ሪፐብሊክ ሰላምና መረጋጋት ለኢትዮጵያ ልማትና እድገትም የሚኖረው ሚና የላቀ ነው" ብለዋል።

የሶማሊያሪፐብሊክ ወደ ቀደመ ገጽታዋ ለመመለስ የፌደራሊዝም ስርዓትን መተግበሯ አዋጭ መሆኑን ጠቁመው፤ ከኢትዮጵያ የሚወሰደው የፌዴራሊዝም ተሞክሮ እንዳለ ሆኖ የህዝቦቿን ልምድ፣ አኗኗርና ባህል መሰረት በማድረግ ሊተገበር እንደሚገባም ጠቅሰዋል።

ሀገሪቱን መልሶ በማደረጃትና የተረጋጋች የልማትና የእድገት ቀጠና እንድትሆን በሚደረገው ጥረትም የኢትዮጵያ መንግስትም ሆነ የአማራ ክልላዊ መንግስት አስፈላጊውን ድጋፍ እንደሚያደርግ አስረድተዋል።

 

የቡድኑ መሪ አብድላሂ መሃመድ በበኩላቸው፥ ሀገራቸው ከ26 ዓመታት በላይ ከማያበራ ብጥብጥና ሁከት በኋላ እንደ ሀገር አንድ ሆና የሚያስቀጥላትን ስርዓት በመዘርጋት ላይ ትገኛለች።

በአሁኑ ወቅት በአንፃራዊነት የተረጋጋ ሰላም የሰፈነባትና ህዝቦቿም የእለት ተግባራቸውን የሚያከናውኑበት ምቹ ሁኔታ ለማምጣት የተለያዩ የልማት ስራዎች መጀመራቸውን ተናግረዋል።

ቀደም ሲል የአካባቢው ሰላም መደፍረስ ያሳሰባት ጎረቤት ሃገር ኢትዮጵያ በተለያየ ጊዜ የሰላም አስከባሪ ሃይል በመላክ ለሰላምና መረጋጋት ጉልህ ሚና ማበርከቷንም ገልፀዋል።

ሶማሊያ ሪፐብሊክን መልሶ በማደረጀትና ጠንካራ መንግስት በማቋቋም ለረጅም ጊዜ የዘለቀውንና በመርህ ላይ የተመሰረተውን ወዳጅነት በማጠናከር እንደቀደመው ሁሉ ተቀራርበው እየሰሩ መሆናቸውን አመልክተዋል።

ሀገራቸው የፌዴራሊዝም ስርዓትን በመተግበር ላይ መሆኗን ጠቁመው፤ ለዚህም የተሻለ የፌደራሊዝም አደረጃጀት ያላትን የኢትዮጵያን ተሞክሮ ለመውስድ መወሰናቸውን አብራርተዋል።

በቆይታቸውም በተለይ በአጎራባች ክልሎች መካከል ለሚፈጠሩ ግጭቶች ጠቃሚ የአፈታት ተሞክሮ ማግኘታቸውን ጠቁመው በብሄር፣ ብሄረሰቦችና ህዝቦች መካከል ካለው ፍትሃዊ የስልጣን ክፍፍል ጥሩ ልምድ መውሰዳቸውን አስታውቀዋል።

በባህር ዳር ከተማ ትናንት በተደረገው የልምድ ልውውጥም የክልሉ የምክር ቤት አወቃቀርና የገንዘብና ኢኮኖሚ ልማት እንቅስቃሴ ልምድ ቀርቦ ውይይት ተደርጎበታል።

25 አበላትን የያዘው የልዑካን ቡድን የአማራ ህዝቦች ሰማዕታት ሃውልትና የቤዛዊት ቤተ መንግስትንና የአማራ ክልል ምክር ቤት ህንፃን እንዲጎበኙ የተደረገ ሲሆን፥ ለልዑካን ቡድኑም ሙሉ የባህዕል አልባሳት ተበርክቶላቸዋል።

ምንጭ፦ ኢዜአ አዲስ አበባ፣ ነሐሴ 6፣ 2009 (ኤፍ.ቢ.ሲ)