ዜና ዜና

በኢትዮጵያ ሶማሌ የሕፃናት ስርዓተ ምግብን ለማሻሻል የባለድርሻ አካላት የተቀናጀ ድጋፍ ያስፈልጋል---ቀዳማዊት እመቤት ወይዘሮ ሮማን ተስፋዬ

በኢትዮጵያ ሶማሌ ክልል የሕፃናትን ስርዓተ ምግብ ለማሻሻልና ችግሮችን ለማቃለል የሁሉም ባለድርሻ አካላት ቅንጅታዊ ድጋፍ እንደሚያስፈልግ ቀዳማዊት እመቤት ወይዘሮ ሮማን ተስፋዬ ተናገሩ ፡፡

በኢትዮጵያ ሶማሌ " ሁለተኛው ክልላዊ የሕፃናት ስርዓተ ምግብ እና የመጀመሪያው አንድ ሺህ ቀናት የሕፃናት ሥርዓተ ምግብ " የሚለው ፕሮግራም በቀዳማዊት እመቤት ሮማን ተስፋዬ እና በክልሉ ርዕሰ መስተዳደር አቶ አብዲ መሐሙድ ትናንት በይፋ ተጀምሯል።

ቀዳማዊት እመቤት ሮማን ተስፋዬ በስነ ስርዓቱ ላይ እንደተናገሩት ጤናማና በሁሉም የልማት ስራዎች በብቃት የሚሳተፍ ዜጋ ለማፍራት የህፃናት ስርዓተ ምግብ መተግበር ጠቀሜታው የጎላ ነው።
በተለይ እናቶች ከእርግዝና ወቅት ጀምሮ ህፃናት ሁለት ዓመት እስኪሞላቸው ድረስ በንጥረ ነገር የበለፀገ ምግብ እንዲያገኙ በማድረግ በአዕምሮ የበለፀገና የተስተካከለ እድገት እንዲኖራቸው ማድረግ ይቻላል።

እንደ ወይዘሮ ሮማን ገለፃ የሥርዓተ ምግብ ችግር በሕፃናት ላይ ያለ ዕድሜ መቀጨጭን እና ሌሎች የጤና ችግሮችን ያስከትላል ።
በክልሉ የሚገኙ ህፃናት ከስርዓተ ምግብ መጓደል ጋር ተያይዞ የሚደርስባቸውን የጤና ችግሮች ለማቃለል የሁሉም አካላት የተቀናጀ ጥረትና ድጋፍ ያስፈልጋል።

የክልሉ ርዕሰ መስተዳድር አቶ አብዲ መሐሙድ "የስርዓተ ምግብ ፕሮግራሙ የህፃናቱን ትምህርት የመቀበል አቅማቸውን በማሳድግ፣ የአዕምሮ ብቃታቸውንና የአካል ጥንካሬያቸው የሚያሻሽሉ ስራዎች የተካተቱበት ነው " ብለዋል ።

በክልሉ ህፃናት ላይ የሚታየውን የምግብ አለመመጣጠን ችግር ለማቃለልና የህብረተሰቡን የአመጋገብ ሥርዓት ለማሻሻል ፕሮግራሙ ወሳኝ ድርሻ እንዳለውም ገልጸዋል፡፡
ፕሮግራሙን ተግባራዊ ለማድረግ ከክልሉ ጤና ቢሮ ጋር በመተባበር የሚሰሩ የክልሉ ትምህርት ቢሮ፣ የሴቶችና ሕፃናት ጉዳይ፣ የውሃ ሀብት ልማት ቢሮን ጨምሮ 11 ሴክተር መስሪያ ቤቶች መለየታቸውን ጠቅሰዋል።

የክልሉ ጤና ቢሮ ኃላፊ አቶ ሐሰን ኢስማዔል እንዳሉት በክልሉ ከአምስት አመት በታች ከሆኑ ህፃናት መካከል 3 ነጥብ 4 በመቶ ያህሉ በእድሜያቸው ልክ ማደግ እንዳልቻሉ እ.እ.አ 2014 በተደረገ ጥናት ተረጋግጧል ።

''የፕሮግራሙ ዓላማ እናቶች ለልጆቻቸው ጠቃሚ የምግብ ይዘቶችን ለይቶ እንዲያውቁ የግንዛቤ ማስጨበጫ ስራዎች በማከናወን ከሥርዓተ ምግብ መጓደል የሚመጡ ችግሮችን በ 2030 ሙሉ በሙሉ መቀነስ ነው'' ብለዋል ።

በሥነ ስርዓቱ ላይ የክልል ስራ ኃላፊዎች የወረዳ ጤና ጽህፈት ቤት አስተባባሪዎች እና በጤናው ሴክተር አጋር ድርጅቶች ተወካዮች ተሳትፈዋል ።

ጅግጅጋ ሀምሌ 9/2009 (ኢዜአ)