ዜና ዜና

በኦሮሚያ የህዝብ ጥያቄዎችን ለመመለስ በተወሰዱ እርምጃዎች አበረታችው ውጤት እየተመዘገበ ነው---አቶ ለማ መገርሳ

በኦሮሚያ የህዝብን የልማትና የመልካም አስተዳደር ጥያቄዎች ለመመለስ በተወሰዱ እርምጃዎች አበረታች ውጤት እየተመዘገበ መሆኑን የክልሉ ፕሬዝዳንት አቶ ለማ መገርሳ ገለጹ።

ፕሬዝዳንቱ ባቀረቡት የ2009 በጀት ዓመት የሥራ አፈፃፀም ሪፖርት እንደገለጹት መንግስት በክልሉ የነበረውን ወቅታዊ የፀጥታ ችግር በህዝብ ተሳትፎና ርብርብ በመፍታቱ ህብረተሰቡ ፊቱን ወደ ልማቱ መልሷል።

ይህም የክልሉን ህዝብ የልማትና የመልካም አስተዳደር ጥያቄ ለመመለስ መንግስት በጥልቅ ተሃድሶው አደረጃጀቱንና አሰራሩን ፈትሾ ተግባራዊ እንቅስቃሴ በማድረጉ የተመዘገበ ስኬት መሆኑን ነው ፕሬዝዳንቱ ያመለከቱት፡፡

በሁለተኛው የዕድገትና ትራንስፎርሜሽን ዕቅድ የትግበራ ዘመን በክልሉ የተያዙትን የልማት ግቦች ለማሳካት ድህነት ተኮር በሆኑ በተለይም በግብርና፣ትምህርት፣ጤና፣በንፁህ የመጠጥ ውሃ አቅርቦትና በሌሎች መስኮች ተስፋ ሰጪ ተግባራት መከናወናቸውን አስታውቀዋል።

በክልሉ 1 ነጥብ 2 ሚሊዮን ዜጎች ቋሚና ጊዜያዊ የሥራ ዕድል የተፈጠረላቸው መሆኑን በሪፖርታቸው ያመለከቱት ፕሬዝዳንቱ በዚህም የሁለተኛ ደረጃ ትምህርት ላጠናቀቁ ወጣቶች፣ለኮሌጅና ዩኒቨርሲቲ ምሩቃን ልዩ ትኩረት መሰጠቱን ተናግረዋል።
ፕሬዝዳንቱ እንዳመለከቱት በ2009 በጀት ዓመት የክልሉ አጠቃላይ ኢኮኖሚያዊ ዕድገት የ10 ነጥብ 4 በመቶ ሆኖ ተመዝግቧል።

በ2008/09 የምርት ዘመን በክልሉ በዋና ዋና ሰብል 144 ሚሊዮን ኩንታል ምርት መገኘቱን አቶ ለማ ጠቁመው በተያዘው የምርት ዘመን ደግሞ 6 ሚሊዮን ሄክታር መሬት በዘር በመሸፈን 185 ሚሊዮን ኩንታል ለማምረት ታቅዶ እየተሰራ መሆኑን ገልጸዋል፡፡

ለዚህም ከ4 ሚሊዮን ኩንታል በላይ ማዳበሪያና ምርጥ ዘር ቀርቧል።
ትምህርት፣ጤና፣መንገድ፣መስኖና የመጠጥ ውሃ ልማት፣የሥራ ዕድል ፈጠራና መልካም አስተዳደር በበጀት ዓመቱ ልዩ ትኩረት የተሰጣቸው መሆኑን ፕሬዘዳንቱ በሪፖርታቸው አመልክተዋል።

አቶ ለማ በሪፖርታቸው እንዳብራሩት በተያዘው በጀት ዓመት የክልሉን አጠቃላይ ዕድገት ለማስቀጠል ኪራይ ሰብሳቢነትን ከማስወገድ ጀምሮ መልካም አስተዳደር እንዲሰፍን በማድረግ ለድህነት ተኮር ተግባራት ትኩረት ይደረጋል፡፡

ጉባኤው በጠቅላይ ፍርድ ቤትና በጠቅላይ ኦዲት መስሪያ ቤት ዕቅድ አፈጻጸም ሪፖርቶችና በሌሎችም አጃንዳዎች ላይ ተወያይቶ ውሳኔ ያሳልፋል ተብሎ ይጠበቃል፡፡

አዳማ ሐምሌ 8/2009 (ኢዜአ)