ዜና ዜና

"መንግስት በቆሻሻ መደርመስ አደጋ ጉዳት የደረሰባቸውን ዜጎች መልሶ ለማቋቋም ትኩረት ሰጥቶ ይሰራል" ም/ጠ/ሚ ደመቀ መኮንን

"መንግስት በቆሻሻ መደርመስ አደጋ ጉዳት የደረሰባቸውን ዜጎች መልሶ ለማቋቋም ትኩረት ሰጥቶ ይሰራል" ም/ጠ/ሚ ደመቀ መኮንን

የኢፌዴሪ መንግስት ከየትኛውም አጀንዳ በላይ በቆሻሻ መደርመስ አደጋ ጉዳት የደረሰባቸውን ዜጎች መልሶ ለማቋቋም ትኩረት ሰጥቶ ይሰራል አሉ ምክትል ጠቅላይ ሚኒስትር ደመቀ መኮንን።

ምክትል ጠቅላይ ሚኒስትሩ አስከሬን ከቆሻሻው በመለየት ሟቾች በክብር እንዲያርፉ ላደረጉት የአካባቢው ወጣቶች እና ነዋሪዎች ምስጋናቸውን አቅርበዋል።

በዛሬው እለትም በአደጋው ቤተሰቦቻቸውን ያጡትን ሀዘንተኞች በስፍራው ተገኝተው አፅናንተዋል።

አቶ ደመቀ በተለይም አብዛኞቹ ሟቾቹ ሴቶች እና ህፃናት እንዲሁም በዝቅተኛ የኑሮ ደረጃ የሚኖሩ የህብረተሰብ ክፍሎች መሆናቸው ሀዘኑን የበለጠ ልብ የሚሰብር አድርጎታል ብለዋል።

የሀዘኑ ተጋሪ የሆነው መንግስትም ጉዳት የደረሰባቸውን ዜጎች መልሶ ለማቋቋም ከየትኛውም ስራ እና አጀንዳ በላይ ትኩረት ሰጥቶ ለመረባረብ ጥረት እያደረገ ይገኛል ነው ያሉት።

ህይወታቸው ያለፉ ዜጎችን በማፈላለጉ ረገድ ሰፊ ስራ ቢሰራም አሁንም የሚቀር እና የሚጠረጠር ካለ ስራው የሚቀጥል ይሆናል ብለዋል።

የከተማ አስተዳደሩ የሚያደርገውን ርብርብ የፌዴራሉ መንግስት እንደሚያግዝም ተናግረዋል።

መጋቢት 2 2009 ዓ.ም በአዲስ አበባ በተለምዶ ቆሼ ተብሎ በሚጠራው አካባቢ በደረሰው የቆሻሻ መደርመስ አደጋ የ113 ሰዎች ህይወት ማለፉ ይታወሳል።

በዚህም ከረቡዕ መጋቢት 6 እስከ መጋቢት 8 2009 የሶስት ቀናት ብሄራዊ የሀዘን ቀን መታወጁ አይዘነጋም።

አዲስ አበባ ፣ መጋቢት 10፣ 2009 (ኤፍ.ቢ.ሲ)